मुंबई: एकनाथ शिंदे यांच्या बंडामुळे अखेरच्या घटका मोजत असलेल्या ठाकरे सरकारने एक मोठा निर्णय घेतला आहे. ठाकरे सरकारने नवी मुंबई आंतरराष्ट्रीय विमानतळाला लोकनेते स्वर्गीय दि.बा.पाटील यांचे नाव देण्यास मान्यता दिली आहे. कालपासूनच मुख्यमंत्री उद्धव ठाकरे (Uddhav Thackeray) असा निर्णय घेतील, अशी चर्चा होती. अखेर बुधवारी मंत्रिमंडळाच्या बैठकीत यावर शिक्कामोर्तब झाले. नवी मुंबई विमानतळाला (Navi Mumbai Airport) लोकनेते दि.बा. पाटील यांचे नाव दिले जावे, अशी प्रकल्पग्रस्त आणि भूमिपुत्रांची इच्छा होती. मात्र, शिवसेना या विमानतळाला बाळासाहेब ठाकरे यांचे नाव देण्यासाठी आग्रही होती. यावरुन नवी मुंबईतील स्थानिकांनी मध्यंतरी आंदोलन करुन निषेधही व्यक्त केला होता. अखेर उद्धव ठाकरे यांनी प्रकल्पग्रस्त आणि स्थानिकांची इच्छा पूर्ण करत वी मुंबई विमानतळाला दि.बा. पाटलांचं नाव देण्यास मंजुरी दिली आहे.
औरंगाबाद आता संभाजीनगर, नामांतराचा मार्ग मोकळा, कॅबिनेटमध्ये प्रस्ताव मंजूर
कोण होते दि.बा. पाटील?

दि. बा. पाटील यांचं पूर्ण नाव दिनकर बाळू पाटील. रायगड जिल्ह्यातील जासई इथं १९२६ साली त्यांचा जन्म झाला. ‘दिबां’चे वडील बाळू पाटील हे शिक्षक होते. सोबत ते शेतीही करत. शिक्षकाच्या घरात जन्मलेल्या ‘दिबां’ना शिक्षणामध्ये चांगली गती होती. पुण्यामध्ये त्यांनी वकिलीचे शिक्षण घेतले.

सामाजिक कामांची आवड असलेले दिबा लोकांसाठी लढता-लढता हळूहळू राजकारणात सक्रिय झाले. त्याकाळी राज्याच्या राजकारणात दबदबा असलेल्या शेतकरी कामगार पक्षातून त्यांची राजकीय कारकीर्द सुरू झाली आणि बहरली. त्यातूनच पुढं ते पनवेलचे नगरपालिकेचे नगराध्यक्ष झाले. पनवेल-उरण विधानसभा मतदारसंघातून ते चार वेळा निवडून गेले होते. राज्य विधानसभेचं विरोधी पक्षनेते पदही त्यांनी भूषवलं होतं. लोकसभेत दोनदा त्यांनी रायगडचं प्रतिनिधित्व केलं. सिडकोच्या माध्यमातून नवी मुंबईची उभारणी होत असताना दि. बा. पाटील हे प्रकल्पग्रस्तांच्या बाजूनं ठामपणे उभे राहिले. शेतकरी व प्रकल्पग्रस्तांसाठी लढे उभारले. तुरुंगवास भोगला.

सिडकोच्या प्रकल्पांमुळं बाधित होणाऱ्या शेतकऱ्यांना जास्तीत जास्त मोबदला मिळवून दिला. रायगड आणि नवी मुंबईतील सामान्य आगरी जनतेबरोबर त्यांचे जिव्हाळ्याचे संबंध होते. ते शेवटपर्यंत कष्टकऱ्यांसाठी लढले. दिबा पाटील हे उत्तम वक्ते होते. त्यांच्या हाकेवर लाखो कार्यकर्ते आंदोलनासाठी सज्ज होत. त्या बळावरच त्यांनी व्यवस्थेच्या विरोधातील अनेक लढे जिंकले. राज्य सरकारचा पहिला उत्कृष्ट वक्ता पुरस्कार त्यांनीच पटकावला होता.

पुढील काळात ते शेतकरी कामगार पक्षातून बाहेर पडले आणि १९९९ रोजी त्यांनी शिवसेनेत प्रवेश केला. मात्र, वयोमानामुळं पुढं त्यांना फार सक्रिय राहता आला नाही. कालांतरानं ते सक्रिय राजकारणातून निवृत्त झाले. आगरी, कोळी समाजाचा दि बा पाटील यांच्यावर मोठा विश्वास होता. आगरी समाजातील अनिष्ट चालीरिती, कर्मकांडांना त्यांनी नेहमी विरोध केला. ‘आगरी दर्पण’ मासिकाच्या माध्यमातून फुले, शाहू, आंबेडकरांचे विचार मांडत असत. दि बा पाटील यांच्या या कार्यामुळंच आज स्थानिक भूमिपुत्र व प्रकल्पग्रस्त त्यांच्या नावाचं आग्रह धरत आहेत.

LEAVE A REPLY

Please enter your comment!
Please enter your name here