मुंबई : विधानसभा अध्यक्षपदाच्या निवडणुकीत भाजपचे उमेदवार राहुल नार्वेकर यांनी शिंदे गट, भाजप आणि अपक्ष आमदारांची १६४ मतं मिळवत बाजी मारली. तर शिवसेना, काँग्रेस, राष्ट्रवादी आणि उर्वरित अपक्षांची १०७ मतं मिळवणारे महाविकास आघाडीचे उमेदवार राजन साळवी पराभूत झाले. याआधी ठाकरे कॅबिनेटमध्ये साळवींचं मंत्रिपद हुकलं होतं, तर आता विधानसभा अध्यक्षपदानेही त्यांना हुलकावणी दिली.

कोकणातील आमदार राजन साळवी यांनी शिवसेना पक्षप्रमुख उद्धव ठाकरे यांच्या पाठीशी राहण्याचा निर्णय घेतलाय. रत्नागिरी जिल्ह्यातील शिवसेनेच्या विद्यमान आमदारांपैकी राजन साळवी हे सगळ्यात ज्येष्ठ आमदार आहेत. त्यांची ही आमदारकीची तिसरी टर्म आहे.

कोण आहेत राजन साळवी?

रत्नागिरीतील राजापूर विधानसभा मतदारसंघातून ते २००९, २०१४ आणि २०१९ असे सलग तीन वेळा ते निवडून आले आहेत. यावेळी काँग्रेसचे उमेदवार अविनाश लाड यांचा पराभव करून ते निवडून आले होते. त्यांनी रत्नागिरी नगरपरिषदेचे नगरसेवक, नगराध्यक्ष तसेच शिवसेना जिल्हाप्रमुखपदावर काम केले आहे.

हेही वाचा : दीपक केसरकर काय चांगला प्रवक्ता झालाय, आम्ही शिकवलेलं वाया गेलं नाही: अजित पवार

सामंतांमुळे मंत्रिपदाची हुलकावणी

रत्नागिरी जिल्ह्यातील शिवसेनेचे ते ज्येष्ठ आमदार असले तरी त्यांना मंत्रिमंडळात काम करण्यासाठी एकदाही संधी मिळालेली नाही, मागील वेळी उदय सामंत यांनी राष्ट्रवादीमधून शिवसेनेत प्रवेश केला. रत्नागिरीतून सामंतांना संधी मिळाल्याने साळवी यांचे मंत्रिपद हुकले होते.

हेही वाचा : ‘इच्छा होईल तेव्हा फक्त कानात सांगा’, सुधीर मुनगंटीवारांची अजितदादांना खुली ऑफर

पराभव निश्चित होता?

या वेळीसुद्धा उद्धव ठाकरे यांनी विधानसभा अध्यक्ष पदाची उमेदवारी साळवींना दिली असली, तरी बहुमत नार्वेकरांच्या बाजूने झुकणार हे स्पष्ट होते, मात्र शिंदे फडणवीस-सरकारमधील ही पहिलीच निवडणूक बिनविरोध होऊ नये, म्हणून राजन साळवी यांना मविआने तिकीट दिल्याचं बोललं जातं.

दरम्यान, चारच दिवसांपूर्वी राजन साळवी यांच्या खांद्यावर शिवसेना उपनेतेपदाची मोठी जबाबदारी उद्धव ठाकरे यांनी दिली आहे. त्यामुळे लवकरच त्यांना पक्षनिष्ठेचं फळ मिळेल, अशी आशा व्यक्त केली जात आहे.

हेही वाचा : औरंगाबादच्या नामांतरावरुन अबू आझमी आक्रमक, पहिल्याच दिवशी नार्वेकरांनी छडी उगारली

LEAVE A REPLY

Please enter your comment!
Please enter your name here