BJp radhakrushna vikhe patil, राधाकृष्ण विखे पाटील मंत्रिपदाच्या शर्यतीत; कोणते खाते मिळणार याकडे जिल्ह्याचं लक्ष – cm eknath shinde government bjp leader radhakrishna vikhe patil in the race for the ministry post

अहमदनगर : राज्यात २०१४ साली भाजप-सेना युतीची सत्ता स्थापन झाल्यानंतर विधानसभेचे विरोधी पक्षनेते म्हणून काम केलेले नगर जिल्ह्यातील नेते राधाकृष्ण विखे पाटील आता भाजपमध्ये आहेत. राज्यात सत्तांतर झाल्यानंतर विधानसभेत विखे पाटील यांना पहिल्या रांगेत स्थान मिळालं आहे. विखे पाटील हे मंत्रिपदाचेही प्रबळ दावेदार मानले जातात. सहकार आणि कृषी क्षेत्रातील कामाचा प्रदीर्घ अनुभव असल्याने त्यांना कोणती खाती दिली जाणार? त्यासोबतच पक्षाकडून पुढील निवडणुकीसाठी त्यांच्यावर काय जबाबदारी सोपवली जाणार, याकडेही त्यांच्या समर्थकांचं लक्ष लागलं आहे.

विरोधी पक्षनेतेपदी असतानाच राधाकृष्ण विखे पाटील यांचे तत्कालीन मुख्यमंत्री देवेंद्र फडणवीस यांच्यांशी चांगले संबंध झाले आणि राजकीय घडामोडींनंतर गेल्या निवडणुकीत ते भाजपमध्ये दाखल झाले. मात्र, २०१९ च्या विधानसभा निवडणुकीनंतर राज्यात ऐतिहासिक महाविकास आघाडी स्थापन झाली आणि भाजपचे सरकार येऊ शकले नाही. त्यामुळे विखेंनाही प्रतीक्षा करावी लागली. मधल्या काळात विखे यांनी राज्यातील आणि दिल्लीतील पक्ष नेत्यांचाही विश्वास संपादन केला. परंतु त्यांच्याविरूद्ध स्थानिक नेत्यांनी तक्रारीही केल्या होत्या. मात्र अलीकडेच झालेल्या सत्तानाट्यात विखे पाटील यांचेही योगदान असल्याचंही सांगितलं जातं. विखे यांचा अनुभव लक्षात घेता त्यांना पहिल्या रांगेत स्थान मिळाले. राज्यात सत्ताबदल झाल्यानंतर विधानसभा अध्यक्षपदासाठीही विखे पाटलांचे नाव चर्चेत आले होते. मात्र या चर्चेनंतर विखे समर्थकांनी नाराजी व्यक्त करत मंत्रिपदाचा आग्रह धरला. विधानसभा अध्यक्षपदावर आता राहुल नार्वेकर यांची निवड झाल्याने राधाकृष्ण विखे पाटील यांना मंत्रिपद आणि कोणते खाते मिळत याकडे लक्ष लागलं आहे. याशिवाय जिल्ह्याचे पालकमंत्रीपद त्यासोबतच पुढील निवडणुकीत पक्षाच्या उमेदवारांची जबाबदारीही त्यांच्यावर सोपविली जाण्याची शक्यता आहे.

Sanjay Raut: लक्षात ठेवा, उद्धव ठाकरेंभोवती असलेल्या ‘चार’ डोक्यांमुळेच तुम्ही सत्तेत होता; संजय राऊत कडाडले

जिल्ह्याचे प्रभारी म्हणून यापूर्वीच देवेंद्र फडणवीस यांची नियुक्ती झाली आहे. मात्र, तेव्हा ते विरोधीपक्ष नेते होते, आता त्यांच्याकडे उपमुख्यमंत्रिपद असल्याने पक्षाकडून दुसऱ्या नेत्यावर नगरची जबाबदारी दिली जाण्याची शक्यता व्यक्त केली जात आहे. नगर जिल्ह्यात राष्ट्रवादीचे स्थान भक्कम आहे. त्याला छेद देण्यासाठी भाजपकडून ताकद लावण्याची तयारी सुरू केली आहे. त्याची चिन्हे मंत्रिपदे आणि जबाबदाऱ्या वाटपातून दिसण्याची शक्यता आहे.

नगर जिल्ह्यातून विधान परिषदेवर नुकतेच निवडून गेलेले प्रा. राम शिंदे यांचेही नाव मंत्रिपदासाठी चर्चेत आहे. त्यासोबतच पाथर्डीच्या आमदार मोनिका राजळे यांनाही महिला लोकप्रतिनिधी म्हणून मंत्रिमंडळात संधी मिळण्याची शक्यता बोलून दाखवली जात आहे. मात्र, आता पदे देताना पुढील निवडणुकीची गणिते डोळ्यासोमर ठेवूनच निर्णय होणार असल्याचे सांगितले जाते. मुख्यमंत्री एकनाथ शिंदे यांच्या गटाचा कोटा वगळूनच उरलेली पदे भाजपला मिळणार आहेत. त्यामुळे तेथे नेमके काय सूत्र ठरते, त्यावर ही गणिते अवलंबून आहेत. याशिवाय आतापर्यंतच्या धक्कातंत्राचा अनुभव पाहता मंत्रिपदाच्या वाटपातही तो दिसणार का? याकडे लक्ष लागलं आहे.