Mumbai Rains : मुंबईत मुसळधार पावसामुळे अंधेरी सबवे बंद, NDRF च्या पाच तुकड्या दाखलपावसामुळे मुंबईतील लोकल ट्रेन आणि रस्ते वाहतुकीची कोंडी पाहायला मिळत आहे. मध्य रेल्वेच्या सायन आणि माटुंगा रेल्वे स्थानकांत रुळ पाण्याखाली गेले आहेत. त्यामुळे मध्य रेल्वेची वाहतूक विलंबाने सुरु आहे. तर अंधेरीतील मिलन सबवे पाण्याखाली गेल्यामुळे या मार्गावरील वाहतूक पर्यायी मार्गाने वळवण्यात आहे. आणखी काही तास मुंबईत पावसाचा जोर कायम राहिल्यास रेल्वे सेवा ठप्प होण्याची भीती आहे.
मुंबई, कोकणात तुफान पाऊस
मुंबईतील परिस्थितीवर देखील मुख्यमंत्री एकनाथ शिंदे बारकाईने लक्ष ठेऊन आहेत. कोकणातील जिल्ह्यांमध्ये जोरदार पावसामुळे काही नद्यांनी इशारा पातळी गाठली असून खबरदारी घेण्याचे निर्देश मुख्यमंत्री एकनाथ शिंदे यांनी दिले आहेत. कुंडलिका नदीने इशारा पातळी ओलांडली आहे. अंबा, सावित्री, पाताळगंगा, उल्हास व गाढी या नद्यांची पाणी पातळी इशारा पातळीपेक्षा थोडे कमी आहे. याशिवाय जगबुडी, काजळी नदीचे पाणी इशारा पातळीवरून वाहत आहे. या भागातील नागरिकांना वेळीच सूचना देणे, प्रसंगी त्यांना हलविणे तसेच जीवितहानी होऊ देऊ नये यासाठी मुख्यमंत्र्यांनी जिल्हाधिकारी तसेच जलसंपदा विभागांना सावध राहून योग्य ती खबरदारी घेण्याचे निर्देश दिले आहेत.
मुंबईत एनडीआरएफच्या पाच तुकड्या दाखल
पावसामुळे मुंबईची अवस्था बिकट आहे. सोमवारी सायंकाळपासून सुरू झालेला पाऊस थांबण्याचं नाव घेत नाही. अशात हवामान खात्यानेही पाच दिवस पावसाचा अंदाज व्यक्त केला आहे. यामुळे प्रशासनाने सुरक्षेच्या दृष्टीने एनडीआरएफच्या पाच तुकड्या दाखल केल्या आहेत.
