कोल्हापूर : राज्यात सत्तापालट झाल्यानंतर भाजपचे विद्यमान प्रदेशाध्यक्ष चंद्रकांत पाटील यांचा मंत्रिमंडळातील समावेश निश्चित मानला जात आहे. या पार्श्वभूमीवर भाजप प्रदेशाध्यक्षपदाची जबाबदारी चंद्रकांत पाटील यांच्याकडून आता दुसऱ्या नेत्यावर सोपवली जाण्याची शक्यता आहे. मागील १५ दिवस भाजपमध्ये एकामागोमाग एक धक्कातंत्र सुरू आहे. एकनाथ शिंदे यांना दिलेले मुख्यमंत्रिपद, देवेंद्र फडणवीस यांना उपमुख्यमंत्री तर राहुल नार्वेकर यांना विधानसभेचे अध्यक्ष करत भाजपने अनेक राजकीय भूकंप केले. याच भूकंपाचा एक भाग म्हणून चंद्रकांत पाटील यांना मंत्रिमंडळाबाहेर ठेवण्याच्या हालचाली सुरू होत्या, मात्र आता पाटील यांचा मंत्रिमंडळात समावेश करण्याचा निर्णय झाल्याचे समजते. त्यामुळे पाटील यांच्याकडील प्रदेशाध्यक्षपद आता पक्षातील दुसऱ्या नेत्याकडे देण्यात येणार आहे.

सध्या प्रदेशाध्यक्षपदासाठी ओबीसी चेहरा म्हणून चंद्रशेखर बावनकुळे तर धनगर समाजाचे नेते म्हणून आमदार राम शिंदे यांचे नाव आघाडीवर आहे. मुंबई महानगरपालिका निवडणुकीच्या पार्श्वभूमीवर आशिष शेलार यांचे नाव ऐनवेळी पुढे येऊ शकते. याशिवाय इचलकरंजी विधानसभा मतदारसंघातील भाजपचे माजी आमदार सुरेश हाळवणकर, आमदार रवींद्र चव्हाण अथवा माजी मंत्री संभाजीराव पाटील निलंगेकर यांचीही नावे चर्चेत आहेत.

आणखी किती जणांना पदावरून हटवणार? मुख्यमंत्री एकनाथ शिंदेंचा उद्धव ठाकरेंना सवाल

एकनाथ शिंदे यांना मुख्यमंत्री करत मराठा समाजाला भाजपने प्रतिनिधित्व दिलं आहे. या पार्श्वभूमीवर ओबीसी समाजाला प्रदेशाध्यक्षपद दिले जाण्याची दाट शक्यता आहे. त्यामुळे बावनकुळे यांचे नाव आघाडीवर आहे. धनगर समाजाला प्रतिनिधित्व देण्याचा निर्णय झाल्यास गोपीचंद पडळकर यांना मंत्रिपद आणि राम शिंदे यांना प्रदेशाध्यक्षपद मिळू शकते.

दरम्यान, येत्या काही दिवसात भाजपमध्ये मोठ्या हालचाली होण्याची शक्यता आहे. प्रदेशाध्यक्ष म्हणून काम करताना चंद्रकांत पाटील यांनी पाच वर्षात पक्षाचा राज्यात मोठ्या प्रमाणात विस्तार केला. विशेषत: पश्चिम महाराष्ट्रात अनेक नेत्यांना पक्षात घेऊन स्थानिक स्वराज्य संस्थाही ताब्यात घेतल्या. यामुळे त्यांचे पक्षातील वजन वाढले. मात्र आता त्यांचा मंत्रिमंडळात समावेश होणार असल्याने भाजपकडून प्रदेशाध्यक्षपदाची जबाबदारी कोणत्या नेत्याकडे दिली जाते, हे पाहावं लागेल.

LEAVE A REPLY

Please enter your comment!
Please enter your name here