dhule attack news updates, मुलींची छेड काढली: जाब विचारताच बाप-लेकावर हल्ला; एकाचा मृत्यू, तर दुसऱ्याची प्रकृती गंभीर – attack on father and son by youths who molest girls 1 passed away 1 inured

धुळे : मुलींची छेड काढल्याचा जाब विचारणाऱ्या बाप-लेकावर जमावाने हल्ला करून त्यांना बेदम मारहाण केल्याचा प्रकार समोर आला आहे. ही घटना धुळे जिल्ह्यातील साक्री तालुक्यातील निजामपूर गावात रविवारी घडली. जमावाच्या मारहाणीत गंभीर जखमी झालेल्या एकाचा मृत्यू झाला असून दुसरा युवक नंदुरबारच्या रुग्णालयात अत्यवस्थ असून सध्या त्याच्यावर उपचार सुरू आहेत. आरोपींना अटक केल्याशिवाय मृतदेह नेणार नसल्याची भूमिका कुटुंबीयांनी घेतल्यानंतर पोलीस पथकाने पाच आरोपींना बेड्या ठोकल्या आहेत. दरम्यान गावात तणावपूर्ण शांतता असून नागरिकांनी अफवांवर विश्वास ठेऊ नये, असं आवाहन पोलीस अधीक्षक प्रविणकुमार पाटील यांनी केलं आहे.

निजामपूर येथे राहणाऱ्या अलविरा अल्ताफ शेख व सोनू मुस्ताक मणियार या दोन्ही मुली किराणा दुकानाकडे जात असताना गावातील सागर आणि मगन या दोघा मुलांनी त्यांचे हात पकडून छेड काढण्याचा प्रयत्न केला. यावेळी असरार मुनाफ मणियार यांनी या दोघा मुलांना छेड काढू नका, असे सांगून हटकले. मात्र यावेळी सागर आणि मगन यांनी असरार याला बेदम मारहाण करण्यास सुरुवात केली. सागरच्या हातात असलेल्या फळीला खिळे ठोकलेले असल्याने असरार मनयार याला गंभीर स्वरूपाच्या जखमा झाल्या.

Bus Accident : एसटी अपघातातील १३ पैकी ८ मृतांची ओळख पटली, महाराष्ट्रातील ५ जणांचा समावेश

असरार याचे वडील मुनाफ गफ्फार मनयार हे देखील भांडण सोडवण्यासाठी गेले असता त्यांना घटनास्थळावर असणाऱ्या अनिल, सतीश, शुभम, गोल्या आणि राकेश यांनी मारहाण करण्यास मदत केली. सागर खैरनार यांनी हातातील फळीने मुनाफ यांना डोक्याच्या मागील बाजूस गंभीर स्वरूपाने मारहाण केली. त्यामुळे मुनाफ जमिनीवर कोसळले. तसंच असरार देखील गंभीर जखमी होऊन जमिनीवर पडला होता. त्याच्या नाकातून रक्त निघत असल्याने त्याला शाहरुख शेख, अखिल शेख यांनी मोटरसायकलवरून जैताने येथील ग्रामीण रुग्णालयात नेलं.

दरम्यान, घटनेची माहिती मिळताच अप्पर पोलीस अधीक्षक प्रशांत बच्छाव, उपविभागीय पोलीस अधिकारी प्रदीप मैराळे, स्थानिक गुन्हे अन्वेषण विभागाचे निरीक्षक हेमंत पाटील हे अतिरिक्त पोलीस पथकांसह निजामपूर गावात पोहोचले. त्यांनी नातेवाईकांची समजूत घालण्याचा प्रयत्न सुरू केला. तसंच पोलीस पथकाने तातडीने हालचाली करत पाच आरोपींना ताब्यात घेतलं आहे. आरोपींचे अटकसत्र सुरू झाल्यामुळे नातेवाईकांचा रोष कमी झाला. यादरम्यान रात्री सात जणांविरोधात वेगवेगळ्या कलमान्वये निजामपूर पोलीस ठाण्यात गुन्हा दाखल करण्यात आला आहे.