चंदिगढ- पंजाबी गायक आणि गीतकार जानी याचा मोहालीजवळ कार अपघात झाल्याची बातमी समोर आली आहे. यावेळी त्याच्यासोबत कार चालक आणि व्हिडिओ डायरेक्टर अरविंदर खैरा होता. या घटनेदरम्यान जानीची गाडी अनेकदा उलटी झाली. प्राथमिक माहितीनुसार चालकाची प्रकृती गंभीर असल्याचे सांगण्यात येत आहे. या घटनेत व्हिडिओ डायरेक्टरला अनेक जखमा झाल्या आहेत. या अपघातात जानी याला किरकोळ जखम झाली आहे.

गीतकार जानी याने २०१२ मध्ये आपल्या करिअरला सुरुवात केली. त्यांच्या ‘शांत सिपाही’ या गाण्याला खूप प्रसिद्धी मिळाली. जानीची गाणी त्याच्या चाहत्यांना खळखळून हसवतात. जानी वेदनादायक आणि रोमँटिक गाणी लिहिण्यातही माहीर आहे. २०१३ मधील सुपरहिट ‘सोच’ हे गाणे जानीच्या लेखणीतून आले आहे. हे गाणे हार्डी संधूने गायले आहे. या गाण्यात हिमांशी खुराना दिसली होती, नंतर हेच गाणे ‘एअरलिफ्ट’ चित्रपटातही नवीन व्हर्जनसह आणले गेले. जानीने सरगुन मेहताचे ‘किस्मत’ हे सुपरहिट गाणे लिहिले आहे. त्याचबरोबर ‘तारा’ आणि ‘जोकर’ सारखी गाणीही जानीने लिहिली आहेत जी खूप प्रसिद्ध आहेत.

Jaani Accident

पंजाबी म्युझिक इंडस्ट्रीतील प्रसिद्ध नाव असलेल्या जानीने ‘नाह’, ‘क्या बात अय’, ‘पछताओगे’, ‘फिलहाल’, ‘तितलिया’, ‘बारिश की जाये’ आणि ‘फिलहाल २ मोहब्बत’ सारखी गाणी रचली आहेत.

३३ वर्षीय जानी हा पंजाबमधील गिद्दरबाहा येथील श्री मुक्तसर साहिब जिल्ह्यातील रहिवासी आहे. त्याने हॉटेल मॅनेजमेंटचा कोर्स केला, पण लहानपणापासूनच त्याचा कल संगीताकडे होता. जानीने २०१८ मध्ये नेहा चौहान- अरोराशी लग्न केले, त्याची पत्नी इंटिरिअर डिझायनर आहे. या वर्षी मे महिन्यात जानी एका मुलाचा पिता झाला. जानीची ‘देसी मेलोडीज’ ही स्वतःची संगीत कंपनी आहे. याच कंपनी अंतर्गत तो आपली सर्व गाणी तयार करतो.


जानीचा पुढचा चित्रपट

अलीकडेच पंजाबी अभिनेत्याने सांगितले होते की जानी त्याच्या पॉलिवुड कॉमेडी-ड्रामा ‘हनीमून’मध्ये भूमिका साकारताना दिसणार आहे. गिप्पी ग्रेवाल आणि जास्मिन भसीन यांच्या प्रमुख भूमिका असलेल्या या चित्रपटात जानीचीही महत्त्वपूर्ण भूमिका असेल.

LEAVE A REPLY

Please enter your comment!
Please enter your name here