मुंबई : राज्यात सत्तापालटानंतर सत्ताधारी आणि विरोधकांकडून एकमेकांवर आरोप-प्रत्यारोपाच्या जोरदार फैरी झडत आहेत. अशातच शिवसेना नेते आणि खासदार संजय राऊत हे पुन्हा एकदा केंद्रीय तपास यंत्रणांच्या निशाण्यावर आले असून राऊत यांना सक्तवसुली संचालनालयाने आज, बुधवारी चौकशीसाठी समन्स बजावलं आहे. मुंबईतील पत्राचाळ पुनर्विकास प्रकल्पासंदर्भात राऊत यांची चौकशी सुरू आहे. या प्रकरणात राऊत यांनी आज ‘ईडी’च्या मुंबई कार्यालयात हजर राहावं, असं समन्समध्ये म्हटलं आहे.

पत्राचाळ पुनर्विकासात झालेल्या कथित घोटाळ्यात संजय राऊत यांची १ जुलै रोजीही १० तास चौकशी झाली होती. ‘केंद्राची तपासयंत्रणा आहे, सहकार्य केलं, त्यांच्या मनात काही शंका असतील तर आमच्या सारख्या लोकांनी दूर केल्या पाहिजेत, माझ्याकडून पूर्ण सहकार्य केलेलं आहे,’ अशी प्रतिक्रिया या चौकशीनंतर राऊत यांनी दिली होती. त्यानंतर आता पुन्हा एकदा त्यांना ईडीकडून समन्स बजावण्यात आलं आहे. त्यामुळे राज्यातील इतर नेत्यांप्रमाणे राऊत यांच्याविरोधातही ईडीकडून कारवाईचा फास आवळला जाण्याची शक्यता निर्माण झाली आहे.

गटनेतेपद शिंदेंच्या पारड्यात; आता चिन्ह, शिवसेना भवन ताब्यात घेण्यासाठी दिल्लीत मोर्चेबांधणी?

संजय राऊतांचा निकटवर्तीयही अटकेत; नेमकं काय आहे प्रकरण?

‘ईडी’ने पत्राचाळ प्रकरणात २ फेब्रुवारी रोजी खासदार संजय राऊत यांचे निकटवर्तीय म्हणून ओळखले जाणाऱ्या प्रवीण राऊत यांना अटक केली होते. ते गुरू आशिष कन्स्ट्रक्शन प्रायव्हेट लिमिटेडचे संचालक आहेत. ही हाऊसिंग डेव्हलपमेंट अॅण्ड इन्फ्रास्ट्रक्चरची (एचडीआयएल) उपकंपनी आहे. या कंपनीने म्हाडाच्या जमिनीवर वसलेल्या पत्राचाळीचा पुनर्विकास करण्यासाठी म्हाडासोबत करार केला होता. ही चाळ तब्बल ४७ एकरावर वसली असून, तेथे ६२७ भाडेकरू आहेत. या सर्वांसाठी घरे बांधून ती म्हाडाला दिली जावी, असा करार सन २०१०मध्ये करण्यात आला होता. त्यानंतर प्रवीण राऊत यांनी एचडीआयएलचे राकेश वाधवान, सारंग वाधवान व अन्य संचालकांना हाताशी घेत या चाळ पुनर्विकासापोटी मिळणाऱ्या चटई क्षेत्र निर्देशांकाची (एफएसआय) परस्पर अन्य बांधकाम विकासकांना विक्री केली. तसंच याद्वारे त्यांनी बेकायदा तब्बल १०७४ कोटी रुपये जमवले. पण त्याचवेळी पत्राचाळीचा मात्र एक इंचदेखील पुनर्विकास केला नाही. त्याखेरीज याआधारे त्यांनी बँकेतूनही ९५ कोटी रुपयांचे कर्ज मिळवले व त्या रकमेचा गैरवापर केला, असा आरोप आहे.

भाजपच्या बड्या नेत्यासोबत ओळख, मंत्रीपद मिळवून देतो; राज्यातल्या दोन आमदारांकडे मागितले १०० कोटी

प्रवीण राऊत यांनी या घोटाळ्यातील ही रक्कम आपल्या जवळचे मित्र आणि नातेवाईकांकडे ट्रान्सफर केल्याचं सांगितलं जातं. तसंच या १०० कोटींपैकी ५५ लाख रुपये संजय राऊत यांच्या पत्नी वर्षा राऊत यांनी दिल्याचा आरोप आहे.

दरम्यान, ईडीकडून बजावण्यात आलेल्या समन्सच्या पार्श्वभूमीवर आज संजय राऊत चौकशीसाठी हजर राहतात का, हे पाहणं महत्त्वाचं ठरणार आहे.

LEAVE A REPLY

Please enter your comment!
Please enter your name here