रत्नागिरी : शिवसेना पक्षप्रमुख उद्धव ठाकरे यांनी कोकणातील पक्षाचे मातब्बर नेते रामदास कदम यांची नेतेपदावरून हकालपट्टी केल्यानंतर कदम यांनी पत्रकार परिषद घेत उद्धव यांच्यावर जोरदार पलटवार केला. शिवसेना वाचवायची असेल तर तुम्ही राष्ट्रवादीचा नाद सोडा, असं कदम यांनी म्हटलं. तसंच शिवसेनेतील ४० आमदार वेगळा विचार करत असतील तर उद्धव ठाकरेंनी आत्मपरीक्षण करायला हवं, असंही ते म्हणाले. या पार्श्वभूमीवर आता गुहागर विधानसभा मतदारसंघातील शिवसेना आमदार आणि माजी मंत्री भास्कर जाधव यांनी रामदास कदम यांना आक्रमक इशारा दिला आहे.

‘मला रामदास कदम यांनी केलेल्या वक्तव्यावर एकदा बोलायचे आहे. मी आज सगळ्या गोष्टींवर लक्ष ठेवून आहे. कोण-कोण या बाबतीत मत मांडत आहे, ते मी पाहतोय. पण रामदास कदमांना मला एकदा रोखठोक उत्तर द्यावं लागेल आणि ते मी योग्यवेळी देईन,’ असं भास्कर जाधव यांनी म्हटलं आहे.

Sanjay Raut: ‘जो डर गया वो मर गया!’; ईडीचं दुसऱ्यांदा समन्स येऊनही संजय राऊत बिनधास्त

‘एकनाथ शिंदेंना पुढे करून भाजप छुपा अजेंडा राबवत आहे’

‘मुख्यमंत्री एकनाथ शिंदे यांना पुढे करून भाजप आपला छुपा अजेंडा राबवत आहे. हे सरकार भारतीय जनता पार्टीचेच आहे हे लोकांच्या मनावर बिंबवण्याचा त्यांचा प्रयत्न आहे. मागील सरकारने घेतलेल्या जनहिताच्या अनेक कामांना स्थगिती देण्याचा निर्णय या सरकारने घेतला. ज्या मंडळींनी भाजपबरोबर जाऊन सरकार बनवले त्यामध्ये आधीच्या उद्धव ठाकरे यांच्या सरकारमधील नऊ मंत्री आहेत. मग त्यांनीच घेतलेले निर्णय चुकीचे होते का? १ एप्रिलला कामांचा निर्णय झाला, त्यामध्ये तुम्ही होतात मग तुम्ही आता गप्प का?’ असा सवाल भास्कर जाधव यांनी शिवसेनेच्या बंडखोर आमदारांना केला आहे.

आदित्य ठाकरेंची आजपासून शिवसंवाद यात्रा, ठाण्यात शक्तीप्रदर्शन, भिवंडीतील मेळाव्यानं सुरुवात

‘लोकशाहीची चिंता वाटते’

महाराष्ट्रातील सत्तासंघर्ष सुप्रीम कोर्टात पोहोचल्यानंतर काल विविध याचिकांवर कोर्टात सुनावणी झाली. या सुनावणीतही कोर्टाने परिस्थिती जैसे थे ठेवल्याचं पाहायला मिळालं. याबाबत प्रतिक्रिया देताना भास्कर जाधव म्हणाले की, ‘सुप्रीम कोर्टामध्ये महाराष्ट्र सरकारचा तिढा गेला आहे. त्याचा निकाल लागेल असं वाटत होतं. अवघ्या जगाचे लक्ष याकडे लागलं होतं. पण हा निर्णय होऊ शकला नाही. याबद्दल फार काही आश्चर्य वाटत नसले तरी लोकशाहीची मात्र चिंता वाटते,’ अशा शब्दात जाधव यांनी आपली नाराजी व्यक्त केली.

LEAVE A REPLY

Please enter your comment!
Please enter your name here