सोलापूर : राज्यात एकनाथ शिंदे यांच्या बंडाच्या रुपाने राजकीय भूकंप झाला आणि उद्धव ठाकरे यांच्या नेतृत्वाखालील महाविकास आघाडी सरकार कोसळलं. सत्ताबदलानंतर राज्यातील राजकीय वारेही बदलण्यास सुरुवात झाली असून शिवसेनेनंतर महाविकास आघाडीतील इतर पक्षांमध्येही पडझड होण्याची शक्यता निर्माण झाली आहे. विधानपरिषद निवडणुकीत आमदारांनी केलेल्या क्रॉस वोटिंगच्या पार्श्वभूमीवर काँग्रेसमध्ये फूट पडणार असल्याचं बोललं जात आहे, तर दुसरीकडे आता राष्ट्रवादीतील नाराज नेत्यांनी थेट भाजप नेते आणि राज्याचे उपमुख्यमंत्री देवेंद्र फडणवीस यांची उघड भेट घेण्यास सुरुवात केली आहे.

देवेंद्र फडणवीस दिल्लीत असताना राष्ट्रवादीचे जेष्ठ आमदार बबनदादा शिंदे आणि मोहोळचे माजी आमदार राजन पाटील यांनी फडणवीस यांची भेट घेतली. या नेत्यांच्या नाराजीची चर्चा सुरू असतानाच झालेल्या भेटीमुळे भाजप प्रवेशाच्या जोरदार चर्चा सुरु झाल्या आहेत. मात्र दोन्ही नेत्यांनी आपण भाजप प्रवेशासाठी भेटलो नसल्याचे सांगितले. असं असलं तरी या नेत्यांची पक्षाविरोधातील नाराजी गेल्या काही महिन्यांपासून लपून राहिलेली नाही. राजन पाटील हे पक्ष सोडण्याच्या मनस्थितीत असल्याचं बोललं जातं. त्यांचे चिरंजीव आणि जिल्हा परिषद सदस्य बाळराजे पाटील यांनी तसे संकेतही दिले आहेत. मात्र राष्ट्रवादीच्या स्थापनेपासून पक्षाचे अध्यक्ष शरद पवार यांचे एकनिष्ठ शिलेदार म्हणून राज्यभरात ओळखले जाणारे राजन पाटील थेट पक्ष सोडण्याच्या मनस्थितीपर्यंत का आले, याची चर्चा आता राजकीय वर्तुळात सुरू झाली आहे.

‘उद्धवजी इतरांना म्हणतात माझ्या वडिलांचा फोटो वापरू नका, मग तुम्ही मोदींचा फोटो का वापरला?’

राजन पाटील आणि राष्ट्रवादी

राजन पाटील यांनी गेल्या ३० वर्षांपासून मोहोळ मतदारसंघात निर्विवाद वर्चस्व गाजवलं आहे. १९९५ साली पहिल्यांदा आमदार झालेल्या पाटील यांनी १९९९ मध्ये राष्ट्रवादीच्या स्थापनेनंतर काँग्रेसमधून बाहेर पडत पवारांची साथ दिली. त्यानंतर १९९९ च्या विधानसभा निवडणुकीतही विजय मिळवत त्यांनी दुसऱ्यांदा विधानसभा गाठली. मतदारसंघात आपली पकड घट्ट केलेल्या राजन पाटलांनी २००४ सालीही प्रतिस्पर्धी उमेदवारांचा पराभव करत विजयाची हॅट्रिक केली. मात्र २००९ नंतर हा मतदारसंघ राखीव झाला. त्यामुळे पाटील हे स्वत: निवडणूक लढवू शकले नाही. मात्र त्यानंतर झालेल्या तीनही विधानसभा निवडणुकीत राजन पाटलांनी पवारांच्या राष्ट्रवादीने दिलेल्या उमेदवारामागे आपलं पाठबळ उभं केलं आणि मतदारसंघात घडाळ्याचा गजर कायम ठेवला.

“राष्ट्रवादीचं ‘खळं’ उठलंय, वस्ती उठायला वेळ लागणार नाही” रामराजे भाजपच्या वाटेवर?

राजन पाटील यांच्या नाराजीमागील नेमकं कारण काय?

पवार कुटुंबाचे निष्ठावान म्हणून ओळख असणाऱ्या राजन पाटील यांना सध्या राष्ट्रवादीचे सोलापूर जिल्हा कार्याध्यक्ष आणि प्रवक्ते उमेश पाटील यांच्याकडून सातत्याने अपमानास्पद आरोपांना सामोरे जावे लागत असून सातत्याने तक्रारी करूनही राजन पाटील यांना पक्षाकडून साथ मिळत नसल्याचे पाटील यांचे दुःख आहे. मतदारसंघात कोणतीही ताकद नसताना आपल्याविरोधात आरोप करणाऱ्या दुय्यम नेत्याला पक्षाकडून ताकद मिळत असल्याची भावना राजन पाटील यांच्या कार्यकर्त्यांत वाढू लागली आहे. तसंच पाटील यांच्या दोन्ही मुलांनाही राष्ट्रवादीच्या नेतृत्वाकडून अपेक्षित पाठबळ मिळत नसल्याचा आरोप आहे. त्यामुळे आता राजन पाटील यांनीही ‘आर या पार’ची भूमिका घेतल्याचे दिसत आहे.

दरम्यान, राजन पाटील यांनी भाजपमध्ये प्रवेश केल्यास मोहोळ विधानसभा आयतीच भाजपला मिळणार असून सोलापूर लोकसभा मतदारसंघातही पक्षाची ताकद वाढणार आहे.

LEAVE A REPLY

Please enter your comment!
Please enter your name here