बाडमेर: राजस्थानच्या बाडमेरमध्ये गुरुवारी रात्री हवाई दलाच्या मिग-२१ विमानाला अपघात झाला. यामध्ये हवाई दलाच्या दोन वैमानिकांना हौतात्म्य आलं. विमान दुर्घटनाग्रस्त होणार असल्याचं लक्षात येताच दोन्ही वैमानिकांनी प्रसंगावधान राखलं. त्यांनी बाडमेरमधील शेकडो जणांचा जीव वाचवला.

बाडमेर जिल्ह्यातील भीमदा गावाच्या बाहेर मिग-२१ विमान कोसळलं. प्रशिक्षणादरम्यान विमानाला अपघात झाला. विंग कमांडर मोहित राणा आणि फ्लाईट लेफ्टनंट अद्वितीय बल विमानाचं सारथ्य करत होते. राजस्थानच्या उतरलाई विमानतळावरून मिग-२१ झेपावलं होतं. रात्री ९ वाजून १० मिनिटांनी विमानाला अपघात झाला.
मिग-२१ च्या अपघातात पायलटचा मृत्यू; शहीदाच्या कुटुंबासोबत विमानात घडला संतापजनक प्रकार
विमानाला आग लागताच वैमानिक ते रहिवासी भाग नसलेल्या परिसरात घेऊन गेले, अशी माहिती स्थानिकांनी दिली. विमान गावावर कोसळलं असतं तर प्रचंड मोठी जीवितहानी झाली असती. गावाची लोकसंख्या ३ हजारांच्या घरात असल्यानं खूप मोठं नुकसान झालं असतं. मात्र वैमानिकांनी समयसूचकता दाखवत जीवितहानी टाळली.

पेट घेतल्यानंतर विमानानं आकाशात दोन-तीन घिरट्या घातल्या. बहुधा वैमानिकांनी गावाचा अंदाज घेतला. त्यानंतर त्यांनी विमान गावाच्या बाहेरच्या दिशेला वळवलं. विमान गावावर कोसळलं असतं तर खूप मोठं नुकसान झालं असतं, असं ग्रामस्थ चंद्र प्रकाश यांनी सांगितलं.
बाल्कनीतून पडलेला मोबाईल वाकून बघताना तोल गेला; वसईत साडे तीन वर्षांच्या मुलीचा मृत्यू
कुटुंबासोबत जेवत असताना विमान दृष्टीस पडल्याचं माजी सैनिक असलेल्या संपत राज यांनी सांगितलं. विमानाला आग लागल्याचं स्पष्ट दिसत होतं. पुढच्या काही मिनिटांमध्ये ते गावाबाहेर कोसळलं. काही ग्रामस्थांनी घटनास्थळी धाव घेतली. त्यांनी वैमानिकांना वाचवण्याचे प्रयत्न केले. मात्र आग वाढल्यानं त्यांचे प्रयत्न तोकडे पडले, असा घटनाक्रम राज यांनी सांगितला.

LEAVE A REPLY

Please enter your comment!
Please enter your name here