औरंगाबाद : मुख्यमंत्री एकनाथ शिंदे यांच्या नेतृत्वात शिवसेनेच्या तब्बल ४० आमदारांनी बंडखोरी करत पक्षप्रमुख उद्धव ठाकरे यांना धक्का दिला. त्यानंतर युवासेनेचे प्रमुख आदित्य ठाकरे यांनी निष्ठा यात्रा काढत बंडखोर आमदारांना थेट त्यांच्या मतदारसंघात जाऊन आव्हान दिलं. आदित्य यांच्या या दौऱ्यानंतर बंडखोर आमदारांच्या वर्चस्वाला धक्का बसणार का, अशी चर्चा सुरू झाली होती. मात्र या बंडखोरांनी आपला बालेकिल्ला सुरक्षित ठेवण्यात यश मिळवल्याचं ग्रामपंचायत निवडणुकीच्या निकालातून स्पष्ट झालं आहे.

औरंगाबामधील पैठण तालुक्यातील एकनाथ शिंदे गटाचे आमदार संदीपान भुमरे यांच्या गटाने ७ पैकी ६ ग्रामपंचायतींवर विजय मिळवला आहे. तर दुसरीकडे, सिल्लोड तालुक्यातील जंजाळा आणि नानेगाव या दोन्ही ग्राम पंचायतींवर शिंदे गटातील आमदार अब्दुल सत्तार यांचे एकहाती वर्चस्व कायम राहिल्याचं समोर आलं आहे.

VIDEO: हिटलरही सर्व निवडणुका जिंकायचा, राहुल गांधींनी पंतप्रधान मोदींना डिवचलं

शिरसाटही गड राखणार

औरंगाबाद पश्चिम विधानसभा मतदारसंघाचे प्रतिनिधित्व करणारे शिवसेनेचे आमदार संजय शिरसाट हेदेखील शिंदे गटात सामील झाले आहेत. या शिरसाट यांच्या मतदारसंघातील वडगाव कोल्हाटी ग्रामपंचायतीच्या एकूण ६ वॉर्डमध्ये १७ सदस्यांसाठी निवडणूक झाली असून सध्या मतमोजणी सुरू आहे. यातील पहिल्या वॉर्डात ३ पैकी ३ उमेदवार आणि दुसऱ्या वॉर्डात देखील २ पैकी २ उमेदवार विजयी करण्यात शिरसाट गटाला यश आलं आहे. अन्य वॉर्डांमध्ये अद्याप मतमोजणी सुरू आहे.

भावाच्या अंत्यसंस्कारासाठी आला अन् जीव गमावून बसला; २४ तासांत कसं नेमकं काय घडलं?

सोलापूरमध्ये उद्धव ठाकरे गटाला दिलासा

सोलापूरच्या चिंचपूर ग्रामपंचायतीमध्ये शिवसेनेतील उद्धव ठाकरे यांच्या गटाचे सर्वच्या सर्व उमेदवार विजयी झाले आहेत. या ठिकाणी शिवसेनेच्या ७ पैकी ७ उमेदवारांचा विजय झाला आहे, तर दुसरीकडे दक्षिण सोलापूर तालुक्यातील मनगोळी ग्रामपंचायतीमध्येही भाजपच्या सुभाष देशमुख यांना मोठा धक्का बसला आहे. मनगोळी ग्रामपंचायतीमध्ये गेल्या १५ वर्षांपासून सुभाष देशमुख गटाची सत्ता होती. मात्र, यंदा मनगोळी ग्रामपंचायतीमध्ये सहापैकी केवळ एका जागेवरच सुभाष देशमुख पॅनलचा उमेदवार विजयी झाला.

दरम्यान, ग्रामपंचायतीच्या निवडणुका खरंतर पक्षाच्या चिन्हावर लढवल्या जात नाहीत. या निवडणुकीत स्थानिक समीकरणे महत्त्वाची ठरतात. मात्र ग्रामपंचायतींच्या पातळीवर निर्माण झालेली राजकीय ताकद पुढे जाऊन विधानसभा निवडणुकीवेळी उमेदवारांसाठी महत्त्वाची ठरते. त्यामुळे या निवडणुकांमध्ये यश मिळवण्यासाठी सर्वच राजकीय पक्षाचे नेते प्रयत्नशील असतात.

LEAVE A REPLY

Please enter your comment!
Please enter your name here