thane accident latest news, खड्ड्यांमुळं दुचाकीचा वेग कमी केला तितक्यात ट्रकने धडक दिली; ठाण्यात खड्ड्यांमुळं आणखी एक बळी – 65 years old man died in accident due to pothole

भिवंडी तालुक्यातील कवाड येथे राहणारी अदिती काबाडी (२५) आणि तिचे वडील अशोक काबाडी (६५) रविवारी सकाळी दुचाकीवरून कवाड येथून वंजारीपट्टी नाक्याकडे जात होते. अदिती दुचाकी चालवत होती. तर तिचे वडील मागे बसले होते. सकाळी ११.३० वाजता नदीनाक्याच्या पुलावर त्यांची दुचाकी आल्यानंतर पुलावरील रस्त्यावर पडलेल्या खड्ड्यांमुळे अदितीने दुचाकीचा वेग कमी केला. त्याचवेळी मागून येणाऱ्या ट्रकने दुचाकीला धडक दिल्याने अदिती रस्त्याच्या डाव्या बाजूला पडली. तर, तिचे वडील उजव्या बाजूला पडले. ट्रकचे चाक त्यांच्या अंगावरून गेले. शरीरामध्ये अंतर्गत दुखापत होऊन अशोक यांचा मृत्यू झाला. अदितीच्या तक्रारीनंतर ट्रक चालक दिनकर पकाळे याच्याविरुद्ध निजामपुरा पोलिस ठाण्यात गुन्हा दाखल करण्यात आला आहे. तसेच पोलिसांनी त्याला अटक केली.

आतापर्यंत खड्ड्यांनी घेतले चार बळी

ठाणे जिल्ह्यात खड्ड्यांनी आतापर्यंत चार बळी घेतले आहेत. ५ जुलै रोजी घोडबंदर रस्त्यावरील काजूपाडा येथे खड्ड्यांमुळे झालेल्या अपघातामध्ये मोहनिश अहमद इरफान खान या दुचाकीस्वाराचा मृत्यू झाला. त्यानंतर बदलापूर पाइपलाइन मार्गावर खड्ड्यात दुचाकी आदळली. यामुळे तरुण रस्त्यावर पडून त्याचा बसखाली चिरडून मृत्यू झाला. २३ जुलै रोजी मुंबई-नाशिक महामार्गावरील रांजणोळी नाक्यापासून काही अंतरावर खड्ड्यात दुचाकी गेल्याने दुचाकीवरील दोघे तोल जाऊन रस्त्यावर पडले. यामध्ये दुचाकीवर मागे बसलेले ब्रिजेशकुमार उर्फ मुनीकाका लेढा जैसवार यांच्या अंगावरून डम्पर गेल्याने त्यांचा मृत्यू झाला. आता पुन्हा भिवंडीमध्ये खड्ड्यामुळे एका जेष्ठ नागरिकाला प्राण गमवावे लागले आहेत.