करोना उपचारासाठी जिल्हा नियोजन आणि विकास मंडळाकडून एक कोटी रुपये देण्यात येणार आहेत, असे उदय सामंत यांनी स्पष्ट केले. गेल्या आठवड्यात रुग्णाचा रिपोर्ट फोडला गेला होता. त्या दोषीवर अत्यंत कठोर कारवाई करण्याचे आदेश जिल्हा पोलीस प्रमुख दीक्षित कुमार गेडाम यांना दिले असल्याचे सामंत यांनी यावेळी सांगितले.
कोकणात गणेशोत्सवाचा सण मोठ्या प्रमाणात साजरा केला जातो. घरोघरी येथे गणेशमूर्तींचे पूजन होते. मुंबईतून मोठ्या संख्येने चाकरमानी कोकणात गणेशोत्सवासाठी येतात. या पार्श्वभूमीवर विचारणा केली असता यंदाचा गणेशोत्सव अत्यंत साधेपणाने घरातच साजरा करावा लागणार असल्याचे सामंत म्हणाले. करोना साथीचा वाढता धोका लक्षात घेता सामंत यांनी हे नमूद केले. राज्याचे उपमुख्यमंत्री अजित पवार यांनी आधीच पुण्यातील गणेशोत्सव मंडळांनी घेतलेल्या निर्णयाचा दाखला देत यंदा राज्यात साधेपणाने गणेशोत्सव साजरा व्हावा, अशी अपेक्षा व्यक्त केली आहे.
दरम्यान, सामंत यांनी घेतलेल्या पत्रकार परिषदेला जिल्हाधिकारी के. मंजुलक्ष्मी, आमदार वैभव नाईक, जिल्हा बँक अध्यक्ष सतीश सावंत, संदेश पारकर, अतुल रावराणे उपस्थित होते.
रत्नागिरीतील प्रयोगशाळेला मंजुरी
करोनाच्या स्वॅबची तपासणी मिरज येथील प्रयोगशाळेत होत आहे. यात अनेकदा विलंब होत असल्याने रत्नागिरी जिल्हा सामान्य रुग्णालय येथे अशी प्रयोगशाळा हवी अशी मागणी होती. या स्वरूपाचा प्रस्ताव जिल्हा प्रशासनातर्फे पाठविण्यात आला होता. त्याला शासनाची मंजुरी प्राप्त झाली आहे.
Ratnagiri News in Marathi, रत्नागिरी न्यूज़, Latest Ratnagiri News Headlines
