solapur mother suicide news, ३ वर्षांच्या मुलीला साडीने गळफास देऊन आईने स्वत:चाही संपवला जीव; मुलगा थोडक्यात बचावला – a mother committed suicide by hanging her 3-year-old daughter with a saree

सोलापूर : मोहोळ तालुक्यातील कोरवली येथे एका महिलेने ३ वर्षाच्या मुलीसह स्वतः गळफास घेऊन आत्महत्या केल्याची घटना सोमवारी सायंकाळी ६ वाजताच्या दरम्यान घडली आहे. या घटनेमुळे सोलापूर जिल्हा हादरला असून प्रीती विजयकुमार माळगोंडे (वय २५) आणि आरोही विजयकुमार माळगोंडे (वय ३ वर्ष ) असं मृत माय-लेकीचं नाव आहे. याप्रकरणी पोलिसांनी महिलेच्या पतीला ताब्यात घेतलं आहे. सुदैवाने या घटनेत मुलगा थोडक्यात बचावला आहे.

कामती पोलिसांकडून मिळालेल्या माहितीनुसार, प्रीतीचे ५ वर्षांपूर्वी कोरवली येथील विजयकुमार माळगोंडे याच्याबरोबर लग्न झाले होते. लग्नानंतर प्रीती व विजयकुमार हे दाम्पत्य त्यांच्या शेतातील घरात राहत होते. त्यांना मुलगी आरोही आणि मुलगा बसवराज असे दोन मुले होती. दीड वर्षांपासून माळगोंडे दाम्पत्यात वाद सुरू झाले होते. पती विजयकुमार हा पत्नी प्रीतीस शारीरिक व मानसिक त्रास देऊन मारहाण व शिवीगाळ करत होता.

सरकार बदलताच आणखी एक चमत्कार, कांजूर कारशेडच्या जागेविरोधातील कोर्टातील याचिका मागे

भावाला कॉल केल्याच्या कारणातून पत्नीला मारहाण

प्रीती आणि विजयकुमार या दाम्पत्याने सोमवारी ८ ऑगस्ट रोजी सकाळी १० वाजता गावातील महादेव मंदिरात येऊन अभिषेक घातला. सोमवारी दुपारी प्रीतीने भाऊ मल्लिनाथ (रा. हत्तुर ता. दक्षिण सोलापूर) याला फोन केला होता. यावरून पती-पत्नीत कडाक्याचे भांडण झाले. त्यानंतर वाद विकोपास जाऊन विजयकुमार याने प्रीतीला चाबकाने व चपलेने मारहाण करून धमकी दिली होती. धमकी देऊन तो जनावरांसाठी वैरण आणण्यासाठी शेतात गेला.

डॉक्टर तरुणीची इन्सुलिनचे ओव्हरडोस घेत आत्महत्या, सुसाईड नोटमध्ये धक्कादायक खुलासा

मुलगा थोडक्यात वाचला

पतीकडून सतत होणाऱ्या त्रासाला कंटाळून प्रीतीने आत्महत्येसारखं टोकाचं पाऊल उचललं आहे. मुलगी आरोही (वय, ३ वर्ष) आणि मुलगा बसवराज (वय, दीड वर्ष) यांना राहत्या घरी पत्र्याच्या लोखंडी अँगलला साडीने गळफास देऊन स्वतःही गळफास घेऊन आत्महत्या केली. दरम्यान मुलगा बसवराज याला गळफास व्यवस्थित न बसल्याने त्याचा जीव वाचला आहे. त्याला उपचारासाठी खासगी रुग्णालयात दाखल करण्यात आलं आहे.

कामती पोलीस ठाण्यात गुन्हा दाखल

मयत प्रीतीचा भाऊ मल्लिनाथ राजशेखर मंगरूळे (रा. हत्तुर ता. दक्षिण सोलापूर) याने विजयकुमार माळगोंडे हा माझ्या बहिणीस सतत शिवीगाळ आणि मारहाण करत असल्याने तिने आत्महत्या केली आहे, अशा प्रकारची फिर्याद कामती पोलीस ठाणे येथे दाखल केली. त्यानंतर पोलिसांनी आरोपी पतीला ताब्यात घेतलं आहे.