sanjay raut, संजय राऊतांना भेटायला सेना आमदार, खासदार गेले; तुरुंग अधिकाऱ्यांनी कायदा सांगितला – mp mlas denied permission to meet shiv sena mp sanjay raut in jail

मुंबई: मनी लॉण्ड्रिंगप्रकरणी शिवसेना खासदार संजय राऊत कोठडीत आहेत. २२ ऑगस्टपर्यंत त्यांना कोठडी सुनावण्यात आली आहे. त्यांचा मुक्काम सध्या ऑर्थर रोड कारागृहात आहे. राऊत यांच्या भेटीसाठी शिवसेनेचे खासदार, आमदार कारागृहात गेले होते. मात्र त्यांना भेटीची परवानगी नाकारण्यात आली.

न्यायालयीन कोठडीत असलेल्या संजय राऊतांच्या भेटीला शिवसेनेचे १ खासदार आणि २ आमदार गेले होते. मात्र ऑर्थर रोड कारागृह प्रशासनानं त्यांना भेटीची परवानगी नाकारली. नियमानुसार कोर्टाच्या परवानगीशिवाय रक्तातील नातेवाईक सोडून इतर कोणीही आरोपीला भेटू शकत नाहीत, असं तुरुंग प्रशासनाकडून शिवसेनेच्या खासदार, आमदारांना सांगण्यात आलं.
शिवसेनेच्या चिन्हाबाबत शरद पवारांचा शिंदेंना महत्त्वाचा सल्ला, म्हणाले…
संजय राऊत यांचे भाऊ सुनील राऊत यांना सोडून इतरांना भेटीसाठी परवानगी घ्यावी लागेल असं सांगण्यात आलं. सुनील राऊत यांनी तुरुंग अधीक्षक नितीन वायचळ यांच्याकडे संजय राऊत यांना वायचळ यांच्या कार्यालयात भेटू द्यावं अशी विनंती केली. मात्र तीदेखील फेटाळण्यात आली. इतर कैदी ज्याप्रकारे त्यांच्या कुटुंबीयांना भेटतात, त्याचप्रमाणे तुम्हाला तुमच्या कुटुंबातील सदस्यांना भेटला येईल, असं संजय राऊत यांना सांगण्यात आलं.

पत्रा चाळ घोटाळा प्रकरणात सक्तवसुली संचलनालयानं संजय राऊत यांच्या घरावर ३१ जुलैला छापा टाकला. दिवसभर त्यांची चौकशी झाली. त्यानंतर रात्री उशिरा त्यांना अटक करण्यात आली. राऊत यांना न्यायालयीन कोठडी सुनावण्यात आली. २२ ऑगस्टपर्यंत त्यांचा मुक्काम ऑर्थर रोड कारागृहात असेल. राऊत यांना अटक केल्यानंतर ईडीनं त्यांच्या पत्नी वर्षा यांना समन्स बजावलं. राऊत पती-पत्नीची ईडीनं समोरासमोर चौकशी केली.