महाराष्ट्र नवनिर्माण विद्यार्थी सेनेचे अध्यक्ष अमित ठाकरे आज, शुक्रवारपासून (१२ ऑगस्ट) तीन दिवसांसाठी पुणे दौऱ्यावर येत आहेत.
म. टा. प्रतिनिधी, पुणे महाराष्ट्र नवनिर्माण विद्यार्थी सेनेचे अध्यक्ष अमित ठाकरे आज, शुक्रवारपासून (१२ ऑगस्ट) तीन दिवसांसाठी पुणे दौऱ्यावर येत आहेत. ठाकरे यांचा पुण्यातील हा पहिलाच राजकीय दौरा असून, ते शहर, जिल्ह्यातील मनसेचे पदाधिकारी, कार्यकर्त्यांशी हितगूज करणार असून, जाहीर कार्यक्रमांद्वारे संवाद साधणार आहेत. आगामी महापालिका निवडणुकांच्या पार्श्वभूमीवर मनसेकडून तयारी सुरू करण्यात आली असून, या पार्श्वभूमीवर अमित ठाकरे यांच्या दौऱ्याला महत्त्व आले आहे. अमित ठाकरे सध्या राज्यात विविध ठिकाणी दौरे काढत असून, मनसेच्या पदाधिकारी, कार्यकर्त्यांशी संवाद साधत आहेत. त्यांचा पुण्यातील पहिलाच राजकीय दौरा असल्याने मनसेच्या कार्यकर्त्यांनी स्वागताची मोठी तयारी केली आहे. ते आज, शुक्रवारी सकाळी लॉ-कॉलेज रस्त्यावरील त्यांच्या निवासस्थानी दाखल होणार आहेत. कार्यकर्त्यांकडून बाइक रॅली काढून त्यांचे स्वागत करण्यात येणार असून, यानंतर ते तेथून कोथरूड येथे कार्यकर्त्यांच्या बैठकीस उपस्थित राहणार आहेत. शहरातील आणि ग्रामीण भागातील कार्यकत्यांच्या ते शुक्रवार आणि शनिवारी बैठका घेणार आहेत. पुण्यातील गणेशोत्सवातील प्रमुख आकर्षण ठरणाऱ्या ढोल पथकांनाही ते भेटी देणार आहेत. त्यानंतर ते रविवारी चापेकर वाड्यास भेट देणार आहे. रविवारी आळंदीत श्री ज्ञानेश्वर माउलींच्या समाधीचे दर्शन घेणार आहेत. हुतात्मा राजगुरू यांच्या वाड्यास भेट देऊन ते खेड, शिरूर, आंबेगाव आणि जुन्नर येथील कार्यकर्त्यांशी संवाद साधणार आहेत.
Marathi News App: तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? सिटिझन रिपोर्टर अॅप डाउनलोड करा आणि रिपोर्ट्स पाठवा.
Web Title : Marathi News from Maharashtra Times, TIL Network
Like this:
Like Loading...
