Eknath Shinde taunts Dhananjay Munde | मुख्यमंत्री एकनाथ शिंदे यांनी पावसाळी अधिवेशनाच्या चौथ्या दिवशी सभागृहात धनंजय मुंडे यांची चांगलीच फिरकी घेतली होती. धनंजय मुंडे यांनी सत्ताधाऱ्यांवर केलेल्या टीकेची मुख्यमंत्र्यांनी सव्याज परतफेड केली होती. विशेष म्हणजे या सगळ्यानंतर पुढील दोन तासांमध्ये करुणा शर्मा या विधिमंडळात मुख्यमंत्री एकनाथ शिंदे यांच्या भेटीला आल्या होत्या.

 

हायलाइट्स:

  • एकनाथ शिंदे यांच्याकडून न्याय मिळेल असा मला विश्वास आहे
  • मला अगोदर १६ दिवसांसाठी आणि नंतर ४१ दिवसांसाठी तुरुंगात टाकण्यात आले
  • आत्महत्या करण्यास प्रवृत्त केले जात आहे
मुंबई: राष्ट्रवादी काँग्रेसचे नेते आणि माजी मंत्री धनंजय मुंडे हे आता करुणा शर्मा प्रकरणात पुन्हा एकदा अडचणीत येताना दिसत आहेत. राज्यातील सत्तांतरानंतर धनंजय मुंडे (Dhananjay Munde) यांच्यावर कारवाई होण्याची शक्यता आहे. कारण, करुणा शर्मा (Karuna Sharma) यांनी सोमवारी विधानभवनात मुख्यमंत्री एकनाथ शिंदे यांची भेट घेऊन आपली व्यथा मांडली. यावेळी करुणा शर्मा यांनी अनेक गंभीर आरोप केले. मला आत्महत्या करण्यासाठी प्रवृत्त केले जात आहे, असे त्यांनी म्हटले. करुणा शर्मा यांच्या या वक्तव्यामुळे खळबळ उडाली आहे. करुणा शर्मा यांच्यावर आत्महत्येसाठी कोण दबाव आणत आहे, असा प्रश्नही उपस्थित झाला आहे.
करुणा शर्मा-मुंडेंच्या अडचणी वाढल्या, पतीसोबत अनैतिक संबंध असल्याचा पुण्यातील महिलेचा आरोप
पावसाळी अधिवेशनाला सुरुवात झाल्यानंतर सभागृहाबाहेर होणारी आंदोलन आणि घोषणाबाजीच्या माध्यमातून विरोधकांनी शिंदे गटाच्या आमदारांना नाकीनऊ आणले होते. या सगळ्यात धनंजय मुंडे आघाडीवर होते. त्यांनी शिंदे गटाच्या आमदारांना अनेक शाब्दिक चिमटे काढले होते. मुख्यमंत्री एकनाथ शिंदे यांनी सोमवारी विधानसभेतील आपल्या भाषणात या सगळ्याची सव्याज परतफेड केली होती. यावेळी एकनाथ शिंदे यांनी अप्रत्यक्षपणे धनंजय मुंडे आणि करुणा शर्मा यांच्यातील संबंधांचा मुद्दा उपस्थित केला होता. ‘धनंजय मुंडे एवढ्या जोरात घोषणाबाजी करत होते, की ते किती वर्षांचे शिवसैनिक आहेत, असं वाटत होतं. बेंबीच्या देठापासून ओरडून, तुमचा घसा खराब होईपर्यंत तुम्ही बोललात, आता तुमचा पण सगळा प्रवास मला माहिती आहे, त्यावेळी देखील आपल्या देवेंद्रजींनी थोडं प्रेम, दया, करुणा दाखवली, दाखवली ना? त्यामुळे थोडं…’, असे एकनाथ शिंदे यांनी म्हणताच सत्ताधाऱ्यांच्या गोटात हशा पिकला होता. साहजिकच या सगळ्यावर धनंजय मुंडे यांना शांत राहावे लागले होते.

‘धनंजय मुंडे बलात्कारी, शरद पवारांनी त्यांना लाथ मारून बाहेर काढावं; करुणा मुंडे संतापल्या

विशेष म्हणजे या सगळ्यानंतर पुढील दोन तासांमध्ये करुणा शर्मा या विधिमंडळात मुख्यमंत्री एकनाथ शिंदे यांच्या भेटीला आल्या होत्या. यावेळी करुणा शर्मा यांनी आपली व्यथा मुख्यमंत्र्यांसमोर मांडली होती. अ‍ॅट्रॉसिटी कायद्यांतर्गत माझ्यावर दोन खोटे गुन्हे दाखल करण्यात आले आहे, ते रद्द करावेत, अशी मागणी करुणा शर्मा यांनी केली. एकनाथ शिंदे यांच्याकडून न्याय मिळेल असा मला विश्वास आहे. मला अगोदर १६ दिवसांसाठी आणि नंतर ४१ दिवसांसाठी तुरुंगात टाकण्यात आले. आत्महत्या करण्यास प्रवृत्त केले जात आहे. माझ्या आईने जशी आत्महत्या केली होती. तशाच पद्धतीने मी आत्महत्या करावी यासाठी मला प्रवृत्त केले जात आहे, असा आरोप करुणा शर्मा यांनी केला होता. त्यामुळे आता मुख्यमंत्री एकनाथ शिंदे यासंदर्भात काय पावलं उचलणार, हे पाहावे लागेल.

जवळच्या शहरातील बातम्या

Marathi News App: तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? सिटिझन रिपोर्टर अॅप डाउनलोड करा आणि रिपोर्ट्स पाठवा.

Web Title : Marathi News from Maharashtra Times, TIL Network

LEAVE A REPLY

Please enter your comment!
Please enter your name here