म. टा. खास प्रतिनिधी, मुंबईः मलबार हिल पोलिस ठाण्यातील पाच पोलिसांनी शुक्रवारी रात्री छत्रपती शिवाजी महाराज टर्मिनससमोरील आराम हॉटेलजवळील गजबजलेल्या ठिकाणी भररस्त्यात धिंगाणा घातला. सार्वजनिक ठिकाणी हुल्लडबाजी आणि आरडाओरड करणाऱ्यांना रोखण्यासाठी गेलेल्या आझाद मैदान पोलिस ठाण्यातील दोन पोलिस कॉन्स्टेबलशी अरेरावी करीत या पाच जणांनी त्यांना धक्काबुक्कीही केली. अखेर पोलिसांची अतिरिक्त कुमक मागवून या पोलिसांना ताब्यात घेण्यात आले आणि घटनेची नोंद आझाद मैदान पोलिस ठाण्यात करण्यात आली.

आझाद मैदान पोलिस ठाण्यातील कॉन्स्टेबल भोसले आणि पाटील शुक्रवारी रात्री आठच्या सुमारास छत्रपती शिवाजी महाराज टर्मिनस स्थानकासमोरील सहायक पोलिस आयुक्तांच्या कार्यालयातून परतत होते. त्याचवेळी त्यांना आराम वडापाव सेंटरजवळ एक कार दिसली. या कारमध्ये बसलेले तरुण आरडाओरड करत होते. कारच्या काचेमधून हात तसेच शरीर अर्धवट बाहेर काढून हुल्लडबाजी सुरू होती. भोसले आणि पाटील संबंधित कारजवळ गेले. त्यांनी कारमधील तरुणांना याबाबत हटकले. ही सार्वजनिक जागा आहे, आम्ही पोलिस आहोत, असे वारंवार सांगूनही कारमधील तरुण ऐकण्याच्या मन:स्थितीत नव्हते. त्यांचा धिंगाणा अधिकच वाढला आणि त्यांनी भोसले आणि पाटील यांनाच धक्काबुक्की करण्यास सुरुवात केली.

परिस्थिती हाताबाहेर जाऊन कायदा आणि सुव्यवस्थेचा प्रश्न निर्माण होऊ नये यासाठी भोसले आणि पाटील यांनी याबाबतची माहिती वरिष्ठ अधिकाऱ्यांना दिली. वरिष्ठ अधिकाऱ्यांच्या आदेशानुसार पोलिसांची अतिरिक्त कुमक मागवून पाच पोलिसांना ताब्यात घेऊन आझाद मैदान पोलिस ठाण्यात नेण्यात आले. त्यावेळेस धिंगाणा घालणारे पाचही जण मलबार हिल पोलिस ठाण्यात नेमणुकीस असल्याचे समोर आले. आझाद मैदान पोलिसांनी या प्रकाराची माहिती मलबार हिल पोलिस ठाणे आणि दक्षिण प्रादेशिक विभागाच्या नियंत्रण कक्षाला दिली. पाच जणांनी केलेल्या धक्काबुक्कीत भोसले आणि पाटील जखमी झाल्याचेही पोलिस सूत्रांनी सांगितले.

गुन्हा नव्हे, डायरीत नोंद
या प्रकरणाची वाच्यता होऊ नये यासाठी गुन्हा दाखल न करता केवळ डायरी नोंद केल्याचेही म्हटले जात आहे. पाच जणांची विभागीय चौकशी सुरू करण्यात आली असून, काहींची नियुक्ती नियंत्रण कक्षात करण्यात आल्याची माहिती पोलिस सूत्रांनी दिली.

LEAVE A REPLY

Please enter your comment!
Please enter your name here