maharashtra monsoon assembly session, शिंदे गटातील आमदाराकडून आई-बहिणीवरून शिवीगाळ; अमोल मिटकरींचा गंभीर आरोप – ncp mla amol mitkaris first reaction on dispute with shiv senas rebel mla mahesh shinde in the assembly monsoon session

मुंबई : पावसाळी अधिवेशन सुरू असताना महाराष्ट्राच्या राजकीय संस्कृतीला काळीमा फासणारी घटना घडली आहे. विधिमंडळाच्या पायऱ्यांवर सत्ताधारी आणि विरोधी पक्षातील आमदार एकमेकांना भिडल्याने मोठा गोंधळ उडाला. यावेळी राष्ट्रवादीचे आमदार अमोल मिटकरी आणि शिवसेनेचे बंडखोर आमदार महेश शिंदे यांच्यात धक्काबुक्की झाल्याचीही माहिती आहे. या सगळ्या राड्याविषयी आमदार अमोल मिटकरी यांनी आपली बाजू मांडत महेश शिंदे यांच्यावर गंभीर आरोप केले आहेत.

‘महाविकास आघाडीची काल बैठक झाली होती. या बैठकीत ठरलं होतं की, सध्या शेतकरी अडचणीत असल्याने सरकारने ओला दुष्काळ जाहीर करावा, या मागणीसाठी विधिमंडळाच्या पायऱ्यांवर आज सकाळी साडेदहा वाजता आंदोलन करण्यात यावं. या आंदोलनासाठी आम्ही विधिमंडळाच्या पायऱ्यांवर जमलो होतो. आंदोलन शांतपणे सुरू होतं. मात्र मुख्यमंत्री एकनाथ शिंदे यांच्या गटातील आमदार महेश शिंदे यांनी आम्हाला धक्काबुक्की करण्याचा प्रयत्न केला आणि आई-बहिणीवरून शिवीगाळ करण्याचाही प्रयत्न केला,’ असा आरोप अमोल मिटकरी यांच्याकडून करण्यात आला आहे.

विधानभवनाच्या पायऱ्यांवर सत्ताधारी-विरोधकांमध्ये बाचाबाची; मिटकरी-रोहित पवार सत्ताधाऱ्यांना भिडले, अखेर अजिततदादा मध्ये पडले

एकनाथ शिंदेंची घेतली भेट

विधिमंडळातील राड्याविषयी माहिती देताना या सगळ्या गोंधळानंतर आम्ही मुख्यमंत्री शिंदे यांची भेट घेतल्याचं अमोल मिटकरी यांनी सांगितलं आहे. ‘आम्ही संस्कृती जपणारी माणसं आहोत. आमच्या पक्षाचे अध्यक्ष शरद पवार यांनी आम्हाला दिलेली शिकवण आम्ही कधी विसरणार नाही. महेश शिंदे यांनी शिवीगाळ केल्यानंतर मी मुख्यमंत्री एकनाथ शिंदे यांची भेट घेऊन त्यांच्या आमदाराला समज द्यावी, अशी मी विनंती केली,’ असं अमोल मिटकरी यांनी म्हटलं आहे.

धर्म परिवर्तनाचा मुद्दा नितेश राणेंनी सभागृहात मांडला, सनसनाटी दावे करत सभागृहाचं लक्ष वेधलं

दरम्यान, लोकप्रतिनिधींमध्ये मारहाण आणि शिवीगाळ झाल्याने राज्यभरात संताप व्यक्त करण्यात येत असून विधिमंडळ परिसरातच असे प्रकार होत असतील तर सर्वसामान्य लोकांनी आदर्श घ्यायचा कोणाकडून, असा प्रश्न उपस्थित करण्यात येत आहे.