मुंबई: गंगापूर-खुल्ताबादचे भाजप आमदार प्रशांत बंब यांनी विधानसभेत शिक्षकांसदर्भात केलेले एक विधान वादग्रस्त ठरले होते. त्यांच्या या वक्तव्यानंतर जिल्हा परिषदेच्या एका शिक्षकाने फोन करुन प्रशांत बंब यांच्यावर आगपाखड केली होती. त्यानंतर आता या शिक्षकाच्या पत्नीनेही प्रशांत बंब यांना झापल्याची माहिती समोर आली आहे. शिक्षकाच्या पत्नी फोन करुन प्रशांत बंब (Prashant Bamb) यांना अद्वातद्वा बोलली. तुमचं विधानसभेतील भाषण ऐकल्यावर मला तेव्हा हाय क्वालिटीची शिवीच आठवली, त्यावेळी मी ती घातलीही, असे या महिलेने म्हटले. त्यावर प्रशांत बंब चांगलेच संतापले. मी महिला म्हणून तुमचा आदर ठेवतोय. तुम्ही महिला असल्याचा फायदा उठवून एका पुरुषाचा छळ करत आहात. मी याविरोधात तक्रार करेन, असे प्रशांत बंब यांनी म्हटले. यावर संबंधित महिलाही चांगलीच संतापली होती. शिक्षक खोटी कागदपत्र तयार करतात, असे तुम्ही म्हणता? तुम्ही किती खोटी कागदपत्रे तयार केलीत, ते सांगू का? गुगलला सर्च मारलं तरी कारखान्याचा घोटाळा दिसतो, असे या महिलेने म्हटले.

यानंतर प्रशांत बंब यांनीही शिक्षकाच्या पत्नीला प्रचंड सुनावले. तुम्ही जनतेचा पैसा खाऊन फुकटचा पगार घेता. मुलांना शिकवत नाही, तुम्ही मुलं बरबाद केलेत आतापर्यंत. तुमच्या मिस्टरांना विचारा, शाळेत काय सुरु आहे, असे प्रशांत बंब यांनी म्हटले. ही ऑडिओ क्लीप सध्या सोशल मीडियावर प्रचंड व्हायरल होत आहे.
झेडपीच्या शिक्षकाने प्रशांत बंब यांचे वाभाडेच काढले, म्हणाला,’आमदार म्हणून तुम्हाला लाज वाटली पाहिजे’

‘आमदार म्हणून तुम्हाला लाज वाटली पाहिजे’

भाजपचे आमदार प्रशांत बंब (Prashant Bamb) आणि एका जिल्हा परिषदेच्या शाळेतील शिक्षकाच्या फोनवरील संवादाची क्लिप गुरुवारी सोशल मीडियावर व्हायरल झाली होती. या शिक्षकाने बंब यांच्या कन्नड तालुक्यातील जिल्हा परिषद शाळांच्या दुरावस्थेबाबत बोलायला सुरुवात केली. तुमच्या तालुक्यातील जिल्हा परिषदांच्या शाळांमध्ये शौचालयं नाहीत, पत्रे उडाले आहेत. तुमचं या शाळांकडे लक्ष आहे का? तुम्ही सरकारी कायद्याबाबत इतकं बोलता, पण तुमच्या भागातील शाळांची तरी तुम्हाला काळजी आहे का, असा प्रश्न या शिक्षकाने विचारला. त्यावर प्रशांत बंब हे चांगलेच संतापले.

यानंतर प्रशांत बंब यांनी संबंधित शिक्षकाला चांगलेच सुनावले. जिल्हा परिषदांच्या शाळांमध्ये शौचालयं नसतील, मुलं उघड्यावर बसत असतील तर शिक्षकांना लाज वाटत नाही का, असे प्रशांत बंब यांनी म्हटले. त्यावर शिक्षकाने क्षणाचाही विलंब न लावता,’आमदार म्हणून तुम्हालाही लाज वाटली पाहिजे ना थोडी’, असे म्हटले.

LEAVE A REPLY

Please enter your comment!
Please enter your name here