मुंबई : काँग्रेस पक्षाचे ज्येष्ठ नेते आणि माजी केंद्रीय मंत्री गुलामनबी आझाद यांनी शुक्रवारी पक्षासोबतचे सुमारे ५० वर्षांचं नातं तोडलं. पक्षाच्या सर्व पदांचा राजीनामा देत ७३ वर्षीय आझाद यांनी काँग्रेस अध्यक्ष सोनिया गांधी यांना लिहिलेल्या पाच पानांच्या पत्रात काँग्रेसच्या राजकीय अधःपतनासाठी सर्वस्वी राहुल गांधी यांना जबाबदार ठरवून त्यांच्या नेतृत्वावर जोरदार टीका केली आहे. आझाद यांनी पक्षातून बाहेर पडण्याचा निर्णय घेतल्यानंतर काँग्रेसमधून उलट-सुलट प्रतिक्रिया उमटत आहेत. काँग्रेसच्या काही ज्येष्ठ नेत्यांनी गुलामनबी आझाद यांच्यावर निशाणा साधला आहे. मात्र काँग्रेस नेते आणि महाराष्ट्राचे माजी मुख्यमंत्री पृथ्वीराज चव्हाण यांनी आझाद यांनी पक्ष सोडण्यामागे काँग्रेस नेतृत्वाला दोष देत आपली नाराजी बोलून दाखवली आहे.

‘गुलामनबी आझाद यांचा राजीनामा ही दुर्दैवी घटना आहे. काँग्रेसला पूर्णवेळ अध्यक्ष मिळावा, अशी मागणी माझ्यासह पक्षातील इतर नेत्यांनी केली होती. पक्ष बळकट होण्यासाठी ही मागणी करण्यात आली होती. यातून पक्षनेतृत्वाला आव्हान देण्याचा प्रश्नच नव्हता. पंतप्रधान नरेंद्र मोदी यांच्या नेतृत्वाखालील भाजपविरुद्ध लढायचं असेल तर काँग्रेसला पूर्णवेळ अध्यक्ष हवा, असं आमचं म्हणणं होतं. त्यासाठी लोकशाही पद्धतीने निवडणूक घेण्यात यावी, असं आम्ही म्हणालो. कारण मागील २४ वर्षांत काँग्रेसमध्ये पक्षांतर्गत निवडणुकाच झालेल्या नाहीत,’ अशा शब्दांत पृथ्वीराज चव्हाण यांनी नेतृत्वावर टीका केली आहे.

मुंबई-पुणे एक्स्प्रेस वेवर लोणावळ्याजवळ अपघात; दोन किमीपर्यंत वाहनांच्या रांगा

दरम्यान, काँग्रेस नेते आणि खासदार राहुल गांधी यांनीच पक्षाचे अध्यक्ष व्हावी, अशी सर्वांची मागणी होती. मात्र केवळ पादुका ठेवून कोणी नेतृत्व करू नये, असं म्हणत पृथ्वीराज चव्हाण यांनी राहुल गांधी यांना टोला लगावला आहे.

करुणा मुंडे यांची संगमनेरमध्ये ३० लाख रुपयांची फसवणूक; आरोपी धनंजय यांच्या ओळखीचे असल्याचा आरोप

पक्ष सोडताना काय म्हणाले गुलामनबी आझाद?

अत्यंत दुःखाने आणि भावूक हृदयाने काँग्रेससोबतचे पाच दशकांचे नाते तोडण्याचा निर्णय घ्यावा लागत असल्याचे नमूद करताना गुलामनबी आझाद यांनी पक्षाची वाताहत केल्याबद्दल राहुल गांधी यांनाच प्रामुख्याने लक्ष्य केलं आहे. ‘राहुल गांधी यांनी पक्षात प्रवेश करताच सल्लामसलतीची पद्धत उद्ध्वस्त केली. जानेवारी, २०१३मध्ये उपाध्यक्ष झाल्यावर त्यांनी ही पद्धतच पूर्णपणे बंद केली. सर्व ज्येष्ठ आणि अनुभवी नेत्यांना अडगळीत टाकले आणि अननुभवी लांगुलचालन करणाऱ्यांचा नवा गट तयार करून पक्ष चालवू लागले. राहुल गांधी यांनी मनमोहन सिंह सरकारने तयार केलेला आणि राष्ट्रपतींनी मंजुरी दिलेला वटहुकूम माध्यमांसमोर फाडून तुकडे करण्याची एकच घटना सन २०१४मधील लोकसभा निवडणुकीतील पराभवाचे सर्वांत मोठे कारण ठरली. या बालिश कृतीमुळे पंतप्रधान आणि राष्ट्रपतींचे औचित्य संपुष्टात आले. लोकसभा निवडणुकीतील पराभवानंतर राहुल गांधी यांनी वैफल्यग्रस्त होऊन काँग्रेस अध्यक्षपद सोडले. त्याआधी त्यांनी काँग्रेसच्या कार्यकारिणीत (सीडब्ल्यूसी) पक्षासाठी आयुष्य वेचणाऱ्या प्रत्येक ज्येष्ठ नेत्याचा अपमान केला. सोनिया गांधी केवळ नावापुरत्या अध्यक्ष असून, सर्व आवश्यक निर्णय राहुल गांधी घेत आहेत. त्यापेक्षाही वाईट म्हणजे हे निर्णय राहुल यांचे सुरक्षा कर्मचारी आणि खासगी सचिव घेत आहेत’, असा आरोप आझाद यांनी केला.

काँग्रेस नेत्यांच्या संतप्त प्रतिक्रिया

आझाद यांच्या राजीनाम्यावर काँग्रेसच्या ज्येष्ठ नेत्यांनी तीव्र आणि संतप्त प्रतिक्रिया व्यक्त केल्या आहेत. ‘ज्या व्यक्तीला काँग्रेस नेतृत्वाने सर्वाधिक सन्मान दिला, त्याच व्यक्तीने काँग्रेसच्या नेतृत्वावर व्यक्तिगत हल्ला करून आपले खरे चरित्र उघड केले आहे. आधी संसदेत मोदींचे अश्रू, नंतर पद्म विभूषण, मग दिल्लीतील बंगल्याला मुदतवाढ… हा योगायोग नाही तर सहयोग आहे’, अशी तिरकस प्रतिक्रिया जयराम रमेश यांनी व्यक्त केली आहे. ‘ज्या काँग्रेस पक्षाने तुम्हाला सर्व काही दिले, त्या पक्षासोबत संकटकाळात दृढपणे उभे राहण्याची गरज होती. साऱ्या देशातील काँग्रेसजन या निर्णयाचा तीव्र निषेध करतील’, असे ज्येष्ठ नेते दिग्विजय सिंह यांनी म्हटले आहे. ‘काश्मीरमध्ये कलम ३७० समाप्त करणाऱ्या लोकांसोबत आझाद यांचे मधुर संबंध झाले असावेत. काँग्रेस जोडण्याची आवश्यकता असल्याचे पत्रात नमूद करणाऱ्या आझाद यांनी काँग्रेस तोडण्यासाठी उचललेल्या पावलाचा आपण तीव्र निषेध करतो. ज्यांच्या कुटुंबाने आझाद यांना सर्व काही दिले त्या सोनिया गांधी विदेशात वैद्यकीय उपचारांसाठी गेल्या असताना आझाद राजीनाम्याचे पाऊल उचलतील, अशी कधीच अपेक्षा नव्हती’, अशी भावना दिग्विजय सिंह यांनी व्यक्त केली.

LEAVE A REPLY

Please enter your comment!
Please enter your name here