पुणे : पुढील वर्षीचा म्हणजे सन २०२३मधील गणेशोत्सव काश्मीरमधील जिल्ह्यांमध्ये साजरा करण्याचा निर्णय शनिवारी मानाच्या गणपतींतर्फे जाहीर करण्यात आला. मात्र, या निर्णयाला श्रीमंत दगडूशेठ हलवाई गणपती ट्रस्टने विरोध दर्शवला असून, या निर्णयाला कोणताही पाठिंबा नसल्याचे त्यांनी जाहीर केले आहे. यामुळे आता नव्या वादाला तोंड फुटण्याची चिन्हे आहेत.

मानाचे पहिले पाच गणपती आणि श्रीमंत भाऊसाहेब रंगारी, अखिल मंडई मंडळ आणि दगडूशेठ हलवाई ट्रस्ट असे एकूण आठ गणपती मिळून शनिवारी अष्टविनायक मंचाची घोषणा करणार होते. या मंडळाच्या पदाधिकाऱ्यांसह पुनीत बालन यांनी या मंचाची घोषणा पत्रकार परिषदेत केली. या परिषदेला दगडूशेठ मंडळाकडून एकही पदाधिकारी उपस्थित नव्हता. याचवेळी बालन यांनी पुढच्या वर्षी काश्मीरमध्ये गणेशोत्सव करण्याचा निर्णय जाहीर केला. किमान दीड दिवस काश्मीरच्या वेगवेगळ्या जिल्ह्यांमध्ये हा उत्सव साजरा केला जाईल, अशी माहिती त्यांनी दिली. याशिवाय प्रत्येक मानाच्या गणपतीने आपल्या बाप्पाची प्रतिकृती या उत्सवासाठी द्यावी, असेही ठरले. त्याला दगडूशेठ ट्रस्ट वगळता इतर सर्व मंडळांनीही दुजोरा दिला. दगडूशेठ हलवाई गणपती ट्रस्टने सुरक्षेच्या कारणांमुळे या उपक्रमाला विरोध दर्शवला. असा उपक्रम जाहीर होत असताना त्याची कोणतीही माहिती नसल्याचेही दगडूशेठ ट्रस्टकडून सांगण्यात आले आहे.

मुंबई-पुणे एक्स्प्रेस वेवरील वाहनांना टोलमाफी; मुख्यमंत्री एकनाथ शिंदे यांनी दिले आदेश

या घोषणेमुळे पुण्यात उत्सवाच्या तोंडावर सुरक्षेविषयी धोका निर्माण होऊ शकतो, अशी भूमिका ट्रस्टकडून मांडण्यात आली आहे. दरम्यान, आता या उपक्रमात पुण्यातील आठऐवजी सात गणपती मंडळे जम्मू-काश्मीरमध्ये गणेशोत्सव साजरा करतील, असे स्पष्टीकरण पुनीत बालन यांनी दिले आहे. कसबा गणपतीचे श्रीकांत शेटे, तांबडी जोगेश्वरीचे केशव नेऊरगावकर, तुळशीबाग मंडळाचे विकास पवार, गुरुजी तालीम मंडळाचे पृथ्वीराज परदेशी, केसरीवाडा गणपती मंडळाचे अनिल सकपाळ, अखिल मंडई मंडळाचे संजय मते यांच्या उपस्थितीत हा निर्णय घेण्यात आला आहे.

राज्यातील सत्तांतरानंतर वेगवान घडामोडी; मुंबई-अहमदाबाद बुलेट ट्रेनबाबत मोठी बातमी

पुण्यातील गणेशोत्सव हा नेहमीच भारतातील नागरिकांसाठी एक पर्वणी असते. पुढील वर्षी पुण्यातील सात मंडळांतर्फे आपल्या बाप्पाच्या प्रतिकृती काश्मीरमधील विविध जिल्ह्यांत बसवण्यात येणार आहेत. पाकिस्तान पुरस्कृत दहशतवादी कारवायांच्या विरोधात हा सांस्कृतिक महोत्सव साजरा करण्यात येणार आहे. – पुनीत बालन, विश्वस्त, भाऊसाहेब रंगारी सार्वजनिक गणेशोत्सव ट्रस्ट

हा निर्णय जाहीर करताना त्याची कोणतीही माहिती आम्हाला देण्यात आली नाही. निर्णय जाहीर झाल्यानंतर पुणे पोलिसांकडून त्यासंदर्भात विचारणा झाली. तेव्हा आम्ही या उपक्रमात सहभागी नाही, असे त्यांना कळवले आहे. राष्ट्रीय सुरक्षेचा प्रश्न निर्माण होऊ नये, यासाठी उचललेले हे पाऊल आहे. – श्रीमंत दगडूशेठ हलवाई गणपती ट्रस्ट

LEAVE A REPLY

Please enter your comment!
Please enter your name here