diva accident, खड्डे चुकवताना तोल गेला; टँकरच्या चाकाखाली आल्यानं तरुणाचा मृत्यू; अपघात सीसीटीव्हीत कैद – in diva biker dies after coming under tanker while trying to evade pothole on road

कल्याण ग्रामीण विधानसभा क्षेत्रातील आणि ठाणे महापालिका हद्दीतील दिवा शहरात रात्री ८ वाजत्या सुमारास एक दुर्दैवी घटना घडली. दिवा-आगासन रोडवर साईबाबा नगर येथे मोठ्या प्रमाणात रस्त्यावर खड्डे आहेत. याच खड्ड्यांमुळे दुचाकीस्वाराचा अपघात झाला आणि तो जागीच मृत पावला. हा संपूर्ण अपघात सीसीटीव्हीमध्ये कैद झाला आहे. गणेश पाले रात्री ८ वाजता दिवा-आगसन रोडवरून जात होता. रस्त्यावर खड्डे असल्याने तो कमी वेगाने दुचाकी चालवत होता. एक खड्डा चुकवत असताना त्याचा तोल गेला आणि तो एका टँकरच्या मागील चाकाखाली आला.

मनसे आमदार राजू पाटील यांनी ट्विट करत कामांच्या फक्त कागदावर घोषणा होत आहेत. पण कामं होत नाहीत.अजून किती बळी घेणार? असा सवाल उपस्थित केला आहे. तर दुसरीकडे दिवा भाजपचे मंडळ अध्यक्ष रोहिदास मुंडे यांनीही ट्विट करत दिवा आगासन रोडवर अजून ठाणे महापालिका किती लोकांचे जीव जाण्याची वाट पाहत आहे? असा प्रश्न विचारला आहे. यापूर्वीही याच रस्त्यावर अपघात झाले आहेत. मात्र ठाणे महापालिकेचे अधिकारी याकडे गांभीर्याने लक्ष देत नाहीत. एकीकडे महापालिकेचे अधिकारी स्मार्ट सिटीचे पुरस्कार घेऊन आपली पाठ थोपटून घेत आहेत. मात्र रस्त्याच्या कामांकडे दुर्लक्ष करत आहे.