dharavi gangrape, दोघे घरात घुसले, चाकूच्या धाकानं बलात्कार केला; धारावी गँगरेप प्रकरणात आता वेगळीच माहिती उघड – dharavi womans gangrape at knifepoint claim fabricated

मुंबई: धारावी सामूहिक बलात्कार प्रकरणात आता वेगळीच माहिती उघडकीस आली आहे. या प्रकरणात पोलिसांनी दोन अल्पवयीन भावंडांना अटक केली होती. मात्र पुराव्याअभावी त्यांना सोडून देण्यात आलं. बलात्कार झाल्याचा दावा करणाऱ्या महिलेबद्दल पोलिसांनी अधिक माहिती गोळा केली. महिलेनं केलेली तक्रार पूर्णपणे खोटी असल्याचं पोलीस तपासातून उघडकीस आलं. महिला तिच्या संसारात आनंदी नव्हती. त्यामुळे तिनं हा संपूर्ण बनाव रचला.

चाकूचा धाक दाखवून आपल्यावर सामूहिक बलात्कार झाल्याचा दावा महिलेनं केला होता. ज्या वेळेत हा प्रकार झाल्याचा दावा महिलेनं केला होता, त्यावेळी ती व्हॉट्स ऍपवर सलग दीड तास ऑनलाईन होती, अशी माहिती मोबाईल फोनच्या तांत्रिक अभ्यासातून उघड झाली. या कालावधीत महिला व्हॉट्स ऍपवर चॅटिंग करत असल्याचे पुरावे पोलिसांना मिळाले.
हात विजेच्या तारेनं बांधले, झाडूनं स्विच ऑन; आत्महत्येसाठी तरुणाचा वेदनादायी मार्ग
पती आणि सासरे घरात नसताना दोन अज्ञात व्यक्ती आपल्या घरात शिरल्या. त्यांनी आपले हात बांधले आणि चाकूच्या धाकानं बलात्कार केल्याची तक्रार महिलेनं नोंदवली होती. ही महिला धारावीतील चाळीत राहते. दोघांनी बलात्कार करताना व्हिडीओ चित्रीकरण केल्याचा दावाही तिनं केला होता.

महिलेची तक्रार ऐकून पोलिसांनी एफआयआर नोंदवला आणि तपास सुरू केला. पोलिसांनी परिसरातील सीसीटीव्ही फुटेज तपासले. १६ मे रोजी पोलिसांनी प्रकरणाची उकल केल्याचा दावा केला. त्यांनी दोन भावंडांना अटक केली होती. या मुलांचे वडील सामाजिक कार्यकर्ते आहेत. त्यांनी वरिष्ठ पोलीस अधिकाऱ्यांची भेट घेतली आणि आपली मुलं निष्पाप असल्याचा दावा केला.
खड्डे चुकवताना तोल गेला; टँकरच्या चाकाखाली आल्यानं तरुणाचा मृत्यू; अपघात सीसीटीव्हीत कैद
दोन भावंडं धारावीतील चाळीत गेल्याचं सीसीटीव्हीत दिसून आलं. आरोप करणाऱ्या महिलेनं त्यांची ओळख पटवल्यानं त्यांना अटक करण्यात आली. मात्र या मुलांनी गुन्हा केला नसल्याचं तपासातून समोर आलं. त्यानंतर पोलिसांनी आणखी सीसीटीव्ही फुटेज तपासली. १७ ते १८ जणांची चौकशी केली. महिलेची वैद्यकीय चाचणी करण्यात आली. तिच्यावर बलात्कार झाला नसल्याचं वैद्यकीय अहवालातून स्पष्ट झालं. आता पोलीस या प्रकरणाचा तपास बंद करणार आहेत.