कोल्हापूर जिल्ह्याची अर्थवहिनी म्हणून ओळखल्या जाणाऱ्या गोकुळला अनन्य साधारण महत्व आहे. जिल्ह्यात एकवेळ आमदारकी नाही मिळाली तरी चालेल पण गोकुळमध्ये संचालक पद मिळावं अशी इथल्या राजकारण्याची इच्छा असते. गोकुळची निवडणूक ते गोकुळचा कारभार आणि कारभारी यांच्याकडे अख्ख्या जिल्ह्याचं लक्ष लागलेलं असतं. गोकुळमध्ये गेली 25 ते 30 वर्ष महाडिक यांची सत्ता होती. मात्र 2021 मध्ये या सत्तेला सुरुंग लावत आमदार सतेज पाटील आणि हसन मुश्रीफ यांनी गोकुळवर एक हाती सत्ता आणली. याचा फटका महाडिक गटाला जोरात बसला कारण महाडिक गटातील एकमेव व्यक्ती निवडून आली, त्या म्हणजे शौमिका महाडिक….
कोण आहेत शौमिका महाडिक ?
शौमिका महाडिक या मूळच्या राजश्री शाहू महाराजांचे जनक घराणे म्हणजे घाटगे कुटुंबातील आहेत
भाजपचे माजी आमदार अमल महाडिक यांच्या त्या पत्नी आहेत,
माजी आमदार महादेवराव महाडिक हे त्यांचे सासरे तर भाजपचे राज्यसभा खासदार धनंजय महाडिक हे त्यांचे दीर आहेत
शौमिका महाडिक यांनी कोल्हापूर जिल्हा परिषदेचं माजी अध्यक्षपद भूषवलं आहे. तसेच ते जिल्हा परिषद सदस्य होत्या.
महाडिक कुटुंब भाजपमध्ये गेल्यापासून पक्षाने शौमिका यांना भाजपच्या महिला जिल्हाध्यक्षपदाची जबाबदारी दिली आहे.
गेल्यावर्षी झालेल्या जिल्हा दूध उत्पादक संघ गोकुळच्या निवडणुकीत शौमिका महाडिक यांनी पाटील-मुश्रीफ गटाच्या अंजना केदारी रेडेकर यांना 43 मतांनी मागे टाकत संचालकपदी निवडणूक आल्या.
गोकुळमध्ये सत्तांतर झाले असले तरीही दरवर्षीप्रमाणे सत्ताधारी आणि विरोधक यांच्यातील खंडाजंगी पहायला मिळाली. सभेसाठी विरोधी सभासदांना बसण्यास जागा न दिल्याने महाडिक गटाच्या संचालिका शौमिका महाडिक यांनी आक्रमक पवित्रा घेतला. ज्या सभासदांनी आम्हाला निवडून दिलं, त्यांच्यासाठी जागा नसेल तर मी मंचावर येणार नाही, असं शौमिका महाडिक म्हणाल्या आणि व्यासपीठावर न जाता सभासदांबरोबर त्या खालीच थांबल्या. दरम्यान गोकुळचे चेअरमन विश्वास पाटील आणि सत्ताधाऱ्यांकडून मांडण्यात आलेल्या ठरावांना त्यांनी कडाडून विरोध केला. विरोधकांना बोलण्यासाठी दिलेला माईक मुद्दाम बंद ठेवल्याचा आरोप त्यांनी केला. तसेच सुगंधी दूध, पॅकेजिंग आणि टँकर अशा अनेक मुद्द्यांना त्यांनी हात घालण्याचा प्रयत्न केला. सत्ताधारी आणि विरोधकांमध्ये प्रचंड गदारोळ सुरु होता. अशातच शौमिका महाडिक यांनी सभा त्याग केला आणि बाहेर येत प्रतिसभा घेण्यास सुरुवात केली.
