दोन दिवसांवर गणेशोत्सव आल्याने सध्या गुहागर तालुक्यामध्ये चाकरमानी येत आहेत. उमराठ घाडेवाडी आणि मराठवाडीतील चाकरमान्यांनी गावी येण्यासाठी बोरिवली आगारातून एस.टी. आरक्षित केली होती. रविवारी सायंकाळी जत डेपोची एसटी (एमएच 11 बीएल 9378) नालासोपारा डेपोतून सुटली. बोरिवली, कांदिवली, मालाड, गोरेगांव, बांद्रा कलानगर, जोगेश्र्वरी, सांताक्रुझ येथून ६ लहान मुलांसह ४२ गणेशभक्तांना घेवून ही एस.टी. गुहागरकडे येण्यास निघाली. मार्ग ताम्हान्यातून बोऱ्या जामसुद मार्गे उमराठकडे ही बस चालली होती. सोमवारी सकाळी ७.१५ वाजता जामसूद पिंपरच्या सीमेवर एस.टी. आली. त्याचवेळी अरुंद रस्त्यावरुन भरधाव वेगाने मुंबईकडे जाणाऱ्या खासगी बसने (क्र. एमएच 04 जेयू 8280) एस.टी.ला धडक दिली. धडक दिल्यानंतर खासगी बसच्या चालकाने अपघातस्थळावरुन गाडीसह पोबारा केला.
मोठी बातमी : भंगाराच्या गोडाऊनमध्ये स्फोट; एका युवकाचा जागीच मृत्यू
या धडकेमुळे उमराठमधील अन्वी भरत घाडे (वय ३.५), प्रेम भरत घाडे (९), समिका संतोष घाडे (१२) या तीन मुलांसह भरत अर्जुन घाडे (४०), प्रकाश पांडुरंग घाडे (४२), निता नंदकुमार आग्रे (३२), आनंदा धाकु बसणकर (४२), अंकिता एकनाथ घाडे (४५), महेंद्र महादेव आग्रे (३६), संदिप संजिवन पवार (४३), सोनल कृष्णा घाडे (२७), किशोरी कृष्णा कुळ्ये (२९), ज्योती प्रकाश घाडे (३५) प्रिया भरत घाडे (३०) प्रमिला कृष्णा घाडे (५५), धीरज राजाराम घाडे (३०) जखमी झाले. या सर्वांना तातडीने हेदवीच्या प्राथमिक आरोग्य केंद्रात नेण्यात आले. तेथील प्रभारी वैद्यकीय अधिकारी चंद्रकांत कदम आणि त्यांच्या टीमने उपचार केले. यामधील निता आग्रे, संदिप पवार, आनंदा बसणकर या प्रवाशांना ओठात दात घुसून मोठी जखम झाल्याने अधिक उपचारासाठी रत्नागिरी जिल्हा रुग्णालयात १०८ रुग्णवाहिकेने हलविण्यात आले आहे.
ट्विन टॉवर पडताच सोमय्यांचं मनोबल उंचावलं, साई रिसॉर्टचा फोटो ट्विट करत अनिल परबांना डिवचलं
अपघाताचे वृत्त कळताच गुहागर आगराचे व्यवस्थापक वैभव पवार, कर्मचारी संदिप वैद्य, तहसीलदार सौ. प्रतिभा वराळे, माजी जि.प. सदस्या सौ. नेत्रा ठाकूर, वेळणेश्र्वरचे माजी सरपंच नवनीत ठाकूर यांनी हेदवी प्राथमिक आरोग्य केंद्रात जावून जखमींची चौकशी केली.
एसटीची तातडीची मदत
या अपघातानंतर गुहागर एस.टी. आगाराचे व्यवस्थापकांनी वरिष्ठांशी चर्चा करुन तातडीने प्रत्येक जखमी गणेशभक्ताला ५०० रुपयांची तत्काळ मदत केली. एस.टी.च्या या निर्णयाबद्दल उमराठमधील ग्रामस्थांनी आभार मानले आहेत.
संभाजी ब्रिगेडसोबतच्या युतीवरून हिणवणाऱ्या फडणवीसांवर भास्कर जाधवांचा पलटवार
पोलिसांनी शोधले मालकाला
एस.टी.ला धडक देवून पोबारा केलेल्या वाहनाचा फोटो एसटी वाहक आणि काही प्रवाशांनी काढला होता. त्यावरुन गुहागर पोलीसांनी खासगी बसच्या मालकाचा शोध घेतला आहे. सदर मालकाला अपघातग्रस्त बससह सायंकाळपर्यंत गुहागर पोलीस ठाण्यात हजर होण्यास सांगितले आहे.
