मुंबई : शिवसेना आणि संभाजी ब्रिगेड यांचे वैचारिक वैमनस्यच होतेच. मात्र, राजकारणात मुख्य अंतर्विरोधाच्या विरोधात शत्रुभावी अंतर्विरोध मावळतात. थोडक्यात, मोठ्या विरोधकासमोर मतभेद विसरून सारे एक होऊ शकतात. शिवसेना पक्षप्रमुख उद्धव ठाकरे यांनी संभाजी ब्रिगेडशी युतीची घोषणा केली. तसेच यापुढच्या निवडणुका एकत्र लढवणार असल्याचंही सांगितलं. पुढे ‘संभाजी ब्रिगेड’ म्हणजे ‘लढवय्या झुंजार संघटना’ असल्याचं म्हणत गुणगौरवही केला. आता शिवसेनेच्या या साऱ्या कौतुकानंतर आणि पाठिंब्यानंतर संभाजी ब्रिगेडने युती घट्ट होण्यासाठी महत्त्वाचं पाऊल टाकलंय. १७ सप्टेंबर रोजी प्रबोधनकार ठाकरे यांची जयंती संपूर्ण राज्यभरात भव्यदिव्य साजरी करण्याचा निर्धार संभाजी ब्रिगेडने केला आहे. यानिमित्ताने शिंदे फडणवीसांच्या धार्मिक राजकारणाला शिवसेना-संभाजी ब्रिगेड मिळून ‘प्रबोधनकारांच्या पुरोगामी स्टाईल’ने उत्तर देण्याचा प्रयत्न करेल.

शिवसेना आणि संभाजी ब्रिगेडची युती होण्याचं सर्वांत मोठं कारण म्हणजे प्रबोधनकारांचा पुरोगामी विचार… देश मोठ्या संकटात असताना आणि प्रादेशिक पक्षांना संपवून टाकण्याची इर्षा मनी बाळगून असलेल्यांना शह देण्यासाठी आम्ही शिवसेनेला पाठिंबा देत आहोत. संभाजी ब्रिगेडने आजवर स्थानिक स्वराज्य संस्थांपासून ते विधानसभा, लोकसभा निवडणुकीत समविचारी पक्षांना घेऊन एकत्र लढण्याचे धोरण अवलंबले आहे. प्रबोधनकारांचा विचार आम्हाला आणि शिवसेनेला एकत्र आणतो. त्यामुळे उद्धव ठाकरे संकटात असताना आम्ही त्यांच्या पाठिशी उभे राहण्याचा निर्णय घेतल्याचं संभाजी ब्रिगेडने म्हटलं. यानंतर शिवसेना आणि संभाजी ब्रिगेड यांच्यातील युतीचा राज्याच्या राजकारणावर कोणता राजकीय परिणाम होईल, याच्या जोरदार चर्चाही झाल्या.

शिंदे फडणवीसांच्या धार्मिक राजकारणाला संभाजी ब्रिगेडचं पुरोगामी उत्तर, शिवसेनाही साथीला?

युतीच्या घोषणेनंतर शिवसेना आणि संभाजी ब्रिगेडचा कोणताही एकत्र कार्यक्रम झालेला नाही. मुंबईत दोन्ही पक्ष एकत्र मेळावा घेणार असल्याच्या चर्चा होत्या. मात्र अशातच प्रबोधनकार ठाकरे यांच्या जयंतीचं औचित्य साधून संभाजी ब्रिगेड आपली ताकद दाखवू शकते. यानिमित्ताने प्रबोधनकार ठाकरे यांच्या विचारांवर प्रकाशझोत टाकण्याचं काम होईल. राज्यभरात विविध कार्यक्रमांद्वारे प्रबोधनकारांच्या विचारांचा जागर होईल. ठिकठिकाणी प्रबोधनकारांच्या पुस्तकांचं वाटपही होईल. त्यानिमित्ताने शिवसेना आणि संभाजी ब्रिगेडचे कार्यकर्ते एकत्र येतील. किंबहुना महाराष्ट्रामध्येही एक प्रकारची वैचारिक घुसळण होईल.

मोठी बातमी: शिवसेना आणि संभाजी ब्रिगेडची युती, निवडणुका एकत्र लढवणार
आजपर्यंत कायम जहाल हिंदुत्ववादी म्हणवून घेणारी शिवसेना संघटना यावेळी प्रबोधनकारांची जयंत राज्यभर साजरी करुन बहुजनवाद्यांनाही साद घालण्याचा प्रयत्न करेल. संभाजी ब्रिगेडचे पुणे जिल्हाध्यक्ष संतोष शिंदे यांनी फेसबुक पोस्ट करुन प्रबोधनकार ठाकरे यांची जयंती संपूर्ण राज्यभरात भव्यदिव्य साजरी करण्याचा निर्धार संभाजी ब्रिगेडने केल्याचं सांगितलं आहे.

एक नवी युती
संभाजी ब्रिगेडच्या साथीने नवा इतिहास घडवेन : उद्धव ठाकरे

शिवसेना आणि संभाजी ब्रिगेड एकत्र आल्याचा मला आनंद आहे. आपली भूमिका रोखठोक आहे. ती आपल्याला पटली म्हणून आपण एकत्र आलो आहोत. आम्ही सत्तेत होतो, सत्ता पुढे येणारच आहे. काही नसताना तुम्ही सोबत आलेला आहात. ही आपली वैचारिक युती झाली आहे, असे प्रतिपादन उद्धव ठाकरे यांनी केले. या लढवय्या सहकाऱ्यांचं मी स्वागत करतो. केवळ महाराष्ट्रातच नाही तर देशात प्रादेशिक पक्ष संपवण्याचं कारस्थान सुरु आहे. न्यायालयातील निर्णय हा देशात लोकशाही राहील की बेबंदशाही राहील, याचा निर्णय असेल. आपल्या विचारांचे लोकं आज सोबत येत आहेत. प्रादेशिक अस्मिता वाचवण्यासाठी एकत्र यायला हवं असं मला अनेकजण म्हणतात. संभाजी ब्रिगेड आणि शिवसेना एकत्र येऊन आपण मोठा इतिहास घडवू, असा विश्वासही उद्धव ठाकरे यांनी व्यक्त केला.

LEAVE A REPLY

Please enter your comment!
Please enter your name here