youth killed in nanded, नांदेडच्या जंगलात तरुणाची निर्घृण हत्या; मृतदेहाजवळ लिंबं, तांब्या अन् फुलं; नरबळीचा संशय – in nanded youth brutally killed in forest relative suspect human sacrifice

नांदेड: जिल्ह्यातील हिमायतनगर तालुक्यातील वाशीच्या जंगलात एका तरुणाचा मृतदेह संशयास्पद स्थितीत सापडला. हिमायतनगर शहरात राहणाऱ्या ३२ वर्षीय पांडुरंग तोटेवाड नावाच्या तरुणाचा मृतदेह आढळून आला. या मृतदेहाशेजारी अघोरी पूजेचे साहित्य सापडल्याने मयताच्या कुटुंबियांनी नरबळीची शंका व्यक्त केली आहे. त्यानुसार उपविभागीय पोलीस अधिकाऱ्याकडून हत्येचा तपास करण्यात येत आहे. तरुणाची हत्या करून त्याच्या मृतदेहाचे व्हिडिओ व्हायरल झाल्याने अनेक शंका उपस्थित करण्यात येत आहेत.

हिमायतनगर शहरात वास्तव्यास असलेल्या पांडुरंगचा मृतदेह तेलंगणा बॉर्डरवर असलेल्या वाशीच्या जंगलात आढळून आला आहे. त्याच्या चेहरा छिन्नविछिन्न अवस्थेत आहे. त्यामुळे त्याची निर्घृणपणे दगडाने ठेचून खून करण्यात आल्याचा संशय आहे. या प्रकरणी पोलिसांनी एका महिलेसह तीन पुरुष अशा ४ आरोपींवर कलम ३०२, ३४ अनुसार खुनाचा गुन्हा दाखल केला आहे.
खंडणी न दिल्यानं चिमुरड्याचं अपहरण करून हत्या; पडक्या इमारतीवर आढळला मृतदेह; पिंपरीत खळबळ
हिमायतनगर शहरातील तरुण पांडुरंग लक्ष्मण तोटेवाडचा मृतदेह तेलंगणा बॉर्डरवर असलेल्या वाशीच्या जंगलात ८ सप्टेंबरला ३ च्या सुमारास छिन्नविछीन अवस्थेत आढळून आला. पांडुरंग त्याच्या घराशेजारी बसलेला असताना आरोपी त्याला काहीतरी आमिष दाखवून बोलावून नेले आणि त्यास वाशीच्या जंगलात घेऊन जाऊन इतर साथीदाराच्या मदतीने निर्घृणपणे दगडाने ठेचून खून केला. हा प्रकार लक्षात येऊ नये म्हणून हा अपघात असल्याचे भासवण्याचा प्रयत्न करण्यात आला होता असे नातेवाईकांनी सांगितले आहे.

तरुणाच्या चेहऱ्याची परिस्थिती पाहता त्याची दगडाने ठेचून खून करण्यात आल्याचे निदर्शनास येते. याबाबत बालाजी तोटेवाड यांनी पोलीस ठाण्यात तक्रार दाखल केली. जुन्या वादातून परमेश्वर लक्ष्मण अक्कलवाड, लक्ष्मण अक्कलवाड, रमेश लक्ष्मण अक्कलवाड, लक्ष्मीबाई लक्ष्मण अक्कलवाड यांनी संगनमत करून खून केल्याप्रकरणी हिमायतनगर पोलीस ठाण्यात कलम ३०२, ३४ भादंविनुसार गुन्हा दाखल करण्यात आला आहे.
कोणीच मदत करणार नाही! आईचा मृतदेह व्हिलचेअरवर ठेवून ६० वर्षांच्या लेकानं गाठलं स्मशान
मृत तरुणाचा व्हिडीओ कोणी काढला, तो कसा व्हायरल झाला, असे प्रश्न नातेवाईकांनी उपस्थित केले. मृतदेहाच्या शेजारी लिंबं, तांब्या आणि फुले दिसत असल्याने हा प्रकार नरबळीचा असल्याचा संशय स्थानिकांनी व्यक्त केला. दरम्यान उपविभागीय पोलीस अधिकाऱ्यांनी घटनास्थळी भेट दिली असून खुनाच्या घटनेचा कसून तपास केला जात आहे.