अहमदनगर : पती-पत्नीतील वादावर अहमदनगरच्या वरिष्ठस्तर दिवाणी न्यायालयाने एक वेगळा निकाल दिला आहे. विवाहनंतर मुलगी सासरी म्हणजेच मुलाच्या घरी नांदायला जाते, अशीच पद्धत रुढ आहे. मात्र, नोकरी करणाऱ्या या उच्चशिक्षित जोडप्याच्या बाबतीत न्यायालयाने पत्नीचा अर्ज मंजूर केला आहे. पतीने केलेला घटस्फोटाचा अर्ज नामंजूर करून दोघांनी पुन्हा विवाह संबंध प्रस्थापित करण्याचा आदेश दिला आहे. पत्नी नोकरीच्या ठिकाणी राहते, तिला पतीच्या मूळ घरी येणे शक्य नसल्याने पतीनेच तिच्या घरी जावे, ही पत्नीच्या अर्जातील विनंतीही मान्य झाली आहे. त्यामुळे या प्रकरणातील पतीला आता पत्नीच्या घरी जावे लागणार आहे. (Ahmednagar Court has given the decision of husband to go to stay at his wife’s house)

अहमदनगर जिल्ह्यातील एका उच्च शिक्षित जोडप्याच्या या खटल्याचा निकाल वरिष्ठस्तर दिवाणी न्यायाधीश एस. एस. पारवे यांनी दिला आहे. यातील पती शिक्षण विभागात श्रीगोंदा येथे तर पत्नी कृषी विभागात राहुरी कृषी विद्यापीठात नोकरीला आहे. लग्नाच्या आधीपासूनच ते नोकरीला आहेत. या दोघांचा विवाह ऑगस्ट २०१४ मध्ये झाला. विवाहच्या दोन वर्षानंतर त्यांना मुलगा झाला. मात्र, मधल्या काळात त्यांच्यात वाद सुरू झाले. त्यामुळे पत्नी नोकरीच्या ठिकाणी राहू लागली. यानंतर पतीने जुलै २०१८ मध्ये न्यायालयात अर्ज करून परस्पर संमतीने घटस्फोटासाठी दावा दाखल केला. यावर न्यायालयात सुनावणी झाली. पत्नीनेही वकीलामार्फत न्यायालयात बाजू मांडली. सासरच्याकडून होत असलेल्या छळाची तक्रार केली. लहान मुल असल्याने आपण सुटीच्या दिवशी पतीच्या मूळ घरी नेहमी जाऊ शकणार नाही. त्यामुळे पतीनेच आपल्या घरी यावे. पतीने केलेला घटस्फोटाचा अर्ज नामंजूर करावा, अशी मागणी पत्नीने केली.

धक्कादायक! बेपत्ता दीपक बर्डेचा खून झाल्याचे उघड, आरोपींनी मृतदेह गोदावरी नदीत फेकला
तर पतीने आपल्या पत्नीकडून सासरच्या लोकांना अपमानास्पद वागणूक देत असल्याचे व आपल्यापासून स्वत:ला दूर केले असल्याने घटस्फोट मिळाला, असा युक्तिवाद केला.

दोन्ही बाजूंचे म्हणणे ऐकल्यानंतर न्यायालयाने निर्णय दिला. दोघांनी एकमेकांवर केलेले छळासह इतर काही आरोप फेटाळून लावले. घटस्फोटाचा अर्जही फेटाळून लावला. कोणी कोणाच्या घरी जायचे यावरून वाद असल्याचे न्यायालयाचे मत बनले. अलीकडच्या काळात महिलाही नोकरी करीत आहेत. त्यांचीही अडचण समजून घ्यायला हवी. लहान मुल सोबत घेऊन पत्नीला राहुरीहून श्रीगोंद्याला जाणे, सुट्टी संपल्यावर परत येणे धावपळीचे आणि त्रासाचे होईल. शिवाय पतीची जिल्ह्यात कोठेही बदली होऊ शकते. पत्नीची मात्र बदली होऊ शकत नाही. शिवाय तिला विद्यापीठात सरकारी घरही मिळाले आहे. ही गोष्ट लग्नाआधीच दोघांनाही माहिती होती. त्यामुळे आताही दोघांनी परस्पर समजुतीने घेऊन पतीने पत्नी राहत असलेल्या घरी जाणे संयुक्तिक ठरेल. त्यानुसार दोन महिन्यांत दोघांनीही पुन्हा एकत्र यावे, असा आदेश न्यायालयाने दिला आहे.

Ahmednagar news : मुस्लिम मुलीशी लग्न, हिंदू तरुणाचे अपहरण, कुटुंबीयांना घातपाताचा संशय
वकील भगवान कुंभकर्ण आणि वकील शिवाजी सांगळे यांनी विवाहित महिलेच्या बाजूने न्यायालयात बाजू मांडली. कुंभकर्ण म्हणाले, ‘लग्नानंतर मुलगी मुलाकडे, म्हणजेच सासरी नांदायला जाते, अशी समाज परंपरा आहे. कायद्याचे अवलोकन केल्यास कायद्यासमोर सर्व समान आहे. त्यामुळे कोणतीही परंपरा कायद्यापेक्षा मोठी ठरत नाही. न्यायालयाने दिलेला हा निकाल तसाच आहे. अधुनिक काळात महिलांच्या व्यक्ती स्वातंत्र्याचा, विचारांना बळ देणारा हा निकाल आहे,’ असे त्यांनी म्हटले.

मोठी बातमी : शिर्डी संस्थानचे विश्वस्त मंडळ अखेर बरखास्त; उच्च न्यायालयाचा आदेश

LEAVE A REPLY

Please enter your comment!
Please enter your name here