सोमवारपासून रिक्षा-टॅक्सी चालकांची बंदची हाक; पण संप सुरू होण्याआधीच फूट – mumbai autorickshaw-taximen’s union has refused to join the strike

२६ सप्टेंबरला घटस्थापना आहे. गणेशोत्सवाच्या धर्तीवर नवरात्रोत्सव देखील उत्साहात साजरा होणार आहे. यामुळे देवी दर्शन आणि दांडियासाठी मोठ्या संख्येने नागरिक बाहेर पडण्याची शक्यता आहे. सणासुदीच्या दिवसात संप झाल्यास प्रवाशांचे मोठे हाल होण्याची शक्यता आहे. यामुळे यंदाच्या नवरात्रोत्सवावर टॅक्सी संपाची छाया असणार आहे. २६ सप्टेंबरपासून घोषित केलेल्या संपात मुंबई ऑटोरिक्षा-टॅक्सीमेन्स युनियनमधील टॅक्सीचालक सहभागी होणार नाहीत. या संपात युनियन सहभागी होणार नाही, असे युनियनचे अध्यक्ष शशांक राव यांनी स्पष्ट केले.

उद्योगमंत्री उदय सामंत यांनी १३ सप्टेंबर रोजी टॅक्सी भाडेवाढीबाबत रिक्षा-टॅक्सी संघटनेच्या प्रतिनिधींची बैठक बोलावली होती. तेव्हा १० दिवसांत भाडेवाढीवर निर्णय घेण्यात येईल, असे आश्वासन दिले होते. मात्र अद्याप भाडेवाढीवर निर्णय झालेला नसल्याने २६ सप्टेंबरपासून बेमुदत टॅक्सी संपाची घोषणा करण्यात आल्याचे मुंबई टॅक्सीमेन्स युनियनचे सरचिटणीस ए. एल. क्वाड्रोस यांनी सांगितले.