shivaji park dasra melava, दसरा मेळाव्याची धार वाढवण्यासाठी शिंदे गटही कामाला; अतिमहत्त्वाची व्यक्ती येणार? – preparation of chief minister eknath shinde group for dussehra rally at bkc ground
मुंबई : दसरा मेळाव्यासाठी कोणाला शिवाजी पार्क मैदान मिळणार, हे स्पष्ट झाल्यानंतर आता दसरा मेळाव्याला आवाज कुणाचा, तसेच खरी शिवसेना कोणाची, हे दाखवून देण्यासाठी शिवसेना पक्षप्रमुख उद्धव ठाकरे आणि मुख्यमंत्री एकनाथ शिंदे यांच्या गटांमध्ये जोरदार चुरस निर्माण झाली आहे. शिवाजी पार्क आणि बीकेसी मैदान अशा दोन्ही ठिकाणी होणाऱ्या दसरा मेळाव्यात सर्वाधिक गर्दी जमवत त्यानिमित्ताने जोरदार शक्तिप्रदर्शन करण्यासाठी प्रत्येकानेच कंबर कसल्याचे पाहायला मिळत आहे.
मुंबई उच्च न्यायालयाने शिवसेना ठाकरे गटाला शिवाजी पार्कवर दसरा मेळाव्यासाठी परवानगी दिल्यानंतर आता उद्धव ठाकरे यांचा शिवाजी पार्कवर मेळावा होणार आहे. शिंदे गट बीकेसी येथील एमएमआरडीए मैदानावर सभा घेणार हे निश्चित झाले आहे. उद्धव ठाकरे यांनी आपल्या शिवसैनिकांना विचारांचे सोने लुटण्यासाठी शिवसेनेची परंपरा असलेल्या दसरा मेळाव्यासाठी निमंत्रित केले असताना एकनाथ शिंदे गटानेही त्यांच्या शिवसैनिकांसाठी नियोजन सुरू केले आहे. खरी शिवसेना कोणाची याबाबतचा वाद सर्वोच्च न्यायालयात प्रलंबित असला, तरी आमच्या मेळाव्याला जमणारी गर्दी हीच आमची शिवसेना आणि तीच खरी शिवसेना, असा संदेश या मेळाव्याच्या निमित्ताने देण्याची संधी मिळाली आहे. त्यामुळे या संधीचे सोने करण्यासाठी दोन्ही गटांनी राज्यभरातील शिवसैनिक मेळाव्याच्या निमित्ताने कसे मुंबईत येतील, यासाठी नियोजन सुरू केले आहे. राज्यातील सत्तासंघर्षावर सुनावणी ठरली, फडणवीसांना दणका, फेडररसाठी प्रतिस्पर्धी रडला… वाचा मटा ऑनलाइनच्या टॉप टेन न्यूज
शिवसेनेला दसरा मेळावा आणि त्यानिमित्ताने शिवाजी पार्कमध्ये होणारी गर्दी हे नवे नसले, तरी यावेळेचा मेळावा मात्र आगळा वेगळा आहे. शिवसेनेमध्ये मोठी फूट पाडत एकनाथ शिंदे आणि भाजप यांनी राज्यातील उद्धव ठाकरे यांचे सरकार खाली खेचले. याविषयी उद्धव ठाकरे या आधी बोलले असले, तरी मेळाव्याच्या निमित्ताने त्यांना पहिल्यांदाच मोठे आणि जाहीर व्यासपीठ मिळणार आहे. त्यामुळे ते शिवसैनिकांशी संवाद साधताना विरोधकांचा लेखाजोखा मांडणार आहेत. सहाजिकच त्यासाठी शिवाजी पार्क मैदान कार्यकर्त्यांनी गच्च भरेल, अशा प्रकारची तयारी उद्धव ठाकरे करत आहेत.
अतिमहत्त्वाची व्यक्ती येणार?
शिंदे गटाला शिवाजी पार्क मैदान मिळाले नसले, तरी बीकेसी एमएमआरडीए मैदानावर दसरा मेळावा घेण्यास परवानगी मिळाली आहे. हे मैदानदेखील शिवाजी पार्क एवढेच मोठे आणि भव्य आहे. राज्यभरातून पाच लाख कार्यकर्ते जमतील, अशा प्रकारची तयारी शिंदे गटाकडून केली जात आहे. सत्ता स्थापन झाल्यानंतर आपली पुढची राजकीय भूमिका, दिशा आणि विचार मांडण्यासाठी शिंदे गट तयार आहे. मेळाव्याच्या निमित्ताने दसरा मेळाव्याच्या व्यासपीठावर एखादी अतिमहत्त्वाची व्यक्ती आणून मेळाव्याची धार वाढविण्यासाठीही शिंदे गट कामाला लागला असल्याचे खात्रीलायक समजते.
राज्यातील सत्तासंघर्षावर सुनावणी ठरली, फडणवीसांना दणका, फेडररसाठी प्रतिस्पर्धी रडला… वाचा मटा ऑनलाइनच्या टॉप टेन न्यूज
