रिक्षा चालक असलेले फिर्यादी संजय तुकाराम तळेकर (६५ तळेरे गावठाण) यांनी दिलेल्या फिर्यादीनुसार, २६ सप्टेंबर रोजी दुपारी १ वाजण्याच्या सुमारास एक जोडपे तळेरे बस स्टँड जवळ संजय तळेकर यांच्या रिक्षेकडे जात तळेबाजार येथे जायचे असल्याचं सांगितलं. यातील त्या पुरुषाचे वय साधारण ३५ ते ४० वर्ष तर महिलेचे वय २५ ते ३० वर्ष होते. तर त्यांच्या सोबत सुमारे दोन ते अडीच वर्षाचा एक लहान मूल देखील असल्याचेही फिर्यादी त्यांनी म्हटलं आहे. यावेळी त्या जोडप्याने आम्हाला तळेबाजार येथे भावी देवी मंदिराकडे जायचे असल्याचे तळेकर यांना सांगितले.
संतापजनक VIDEO: महिला वाहतूक पोलिसाच्या अंगावर घातली भरधाव दुचाकी; पती-पत्नीला अटक
तळेकर यांनी त्यांना १ हजार रुपये भाडे होईल असं सांगितलं. ते भाडं मान्य झाल्याने त्या जोडप्याला मुलासह तळेकर हे भावी देवी मंदिराजवळ घेऊन गेले. त्यावेळी त्या संशयित जोडप्याने तळेकर यांच्याशी बोलत असताना आम्हाला मूल व्हावे म्हणून त्या जोडप्याच्या मित्राने या देवीकडे मन्नत मागितली आहे, असे हिंदीत बोलत सांगितले. तसेच ती मन्नत पूर्ण झाल्याने आज या देवाला आलो असे त्या जोडप्याने तळेकर यांना सांगितले. त्या मंदिरात त्या जोडप्याने नारळ व पेढे ठेवून नमस्कार करुन निघत असताना आम्हाला आता कुणकेश्वर येथे जायचे आहे, असं तळेकर यांना सांगितले. यावेळी तळेकर यांनी रिक्षा देवगड रोडच्या दिशेने घेतली.
या दरम्यान त्या जोडप्याने आम्ही गणपतीपुळे येथील देवदर्शनाचा पेढा आणलेला आहे तो घ्या असे सांगत रिक्षा चालक तळेकर यांना पेढा दिला. व त्यानंतर देवगड जामसडे येथे रिक्षा आली असता या जोडप्याने रिक्षा एका टपरी जवळ थांबवण्यास सांगितली. रिक्षा थांबवल्यावर त्या जोडप्याने तळेकर यांना एक थंड पेयाची बाटली आणून दिली. ते थंडपेय तळेकर यांनी प्यायले. त्यानंतर आम्हाला कुणकेश्वर येथे जायचे नाही असे सांगत त्या जोडप्याने तळेकर यांना आम्हाला पुन्हा तळेरे स्टॅन्ड येथे सोडा अस सांगितले. त्यानंतर पुढे काय घडलं हे मला आठवत नसल्याचं तळेकर यांनी दिलेल्या फिर्यादीत म्हटलं आहे.
दरम्यान, यानंतर तळेकर यांना कणकवलीत एका खाजगी रुग्णालयात उपचाराकरता दाखल करण्यात आले. तळेकर यांना आज बुधवारी संध्याकाळी ५ वाजता पूर्ण शुद्ध आली त्यावेळी त्यांना आपण लुटलो गेल्याचे त्यांच्या लक्षात आले. यात त्यांची ५० हजार रुपये किमतीची २० ग्रॅमची सोन्याची चैन, १२ हजारच्या दोन सोन्याच्या अंगठ्या, १४ हजार किमतीच्या दोन सोन्याच्या अंगठ्या, ८ हजार रोख रक्कम आणि ५०० रुपयांचे सोनाटा गोल्डन घड्याळ असा एकूण ८४ हजार ५०० रुपयांचा मुद्देमाल त्या जोडप्याने लंपास केल्याची फिर्याद तळेकर यांनी दिली आहे. त्यानुसार संशयित जोडप्याच्या विरोधात कलम ३२८, ३७९, ३४ नुसार गुन्हा दाखल करण्यात आला आहे.
पोलीस निरीक्षक सचिन हुंदळेकर यांच्या मार्गदर्शनाखाली हा गुन्हा नोंदविण्यात आला. मात्र, हा प्रकार देवगड मध्ये घडल्याने कणकवली पोलिसांनी हा गुन्हा दाखल करुन तो शून्य नंबर ने देवगड पोलिसांकडे वर्ग केल्याची माहिती पोलिसांनी दिली. दरम्यान तळेरे स्टॅन्ड येथे रिक्षात बसतानाचा या जोडप्याचा सीसीटीव्ही फुटेज व्हिडीओ आता समोर आला आहे.
महाराष्ट्रातली शिवसेना फुटली, पण मुंबईतले आमदार, बहुतांश नगरसेवक अजून ठाकरेंसोबतच
