podar school santacruz, वर्ग सुरू असताना शिक्षकाची विद्यार्थ्याला अमानुष मारहाण; कानाचा पडदा फाटला, मुंबईतील धक्कादायक प्रकार – podar school santacruz the eardrum was torn due to the teacher beating

सांताक्रूझ पूर्वेकडे राहत असलेला नीरज यादव हा लिंकिंग रोडवरील शेठ आनंदीलाल पोतदार विद्यालयात नववीत शिक्षण घेत आहे. २९ सप्टेंबर रोजी दुपारी तीनच्या सुमारास वर्गात संस्कृत विषयाचा तास सुरू होता. नीरज चेहऱ्यावर हात ठेवून बसल्याचे संस्कृतचे शिक्षक कमलेश तिवारी यांना दिसले. तो हाताच्या आडून इतर विद्यार्थ्यांसोबत बोलत असल्याचे त्यांना वाटले. कमलेश तिवारी नीरजच्या बाकाजवळ गेले आणि काही न विचारताच त्यांनी नीरजला मारहाण करण्यास सुरुवात केली. चेहऱ्यावर आणि डाव्या बाजूच्या कानशिलात त्यांनी अनेकदा मारले. नीरजच्या शेजारी बसलेला विद्यार्थी कृष्णा चौहान यालादेखील मारहाण करण्यात आली. तिवारी यांनी डाव्या कानाजवळ केलेल्या मारहाणीमुळे नीरजला या कानाने ऐकू येणे बंद झाले. नीरजने थेट मुख्याध्यापकांचे कार्यालय गाठले आणि त्यांच्या हा प्रकार लक्षात आणून दिला.

मुख्याध्यापकांनी घटनेची गंभीर दखल घेत दोन शिक्षकांसोबत नीरजला खार येथील रामकृष्ण मिशन रुग्णालयात पाठविले. कानाचे डॉक्टर नसल्याने इतर डॉक्टरांनी तपासून तात्पुरते औषध दिले. दुसऱ्या दिवशी नीरज शाळेत गेल्यानंतर दोन शिक्षकांनी त्याला कानाच्या डॉक्टरांकडे नेले. या डॉक्टरांनी नीरजला तपासले असता मारहाणीमुळे त्याच्या कानाचा पडदा फाटला गेल्याचे सांगितले. शिक्षकाच्या मारहाणीमुळे मुलाचा कान निकामी झाल्यामुळे संतप्त झालेल्या नीरजच्या पालकांनी कमलेश तिवारी याच्याविरोधात सांताक्रूझ पोलिस ठाण्यात तक्रार केली. या तक्रारीवरून पोलिसांनी तिवारी याच्याविरोधात भादंवि कलम ३२५ (दुखापत) आणि लहान मुलांची काळजी व संरक्षण कायदाच्या कलम ७५अन्वये गुन्हा दाखल केला आहे.