Maharashtra Politics | शिंदे गटाने दावा केल्याप्रमाणे बीकेसीवरील दसरा मेळाव्यासाठी खरोखरच तीन लाख कार्यकर्ते जमले तर आजच्या आज शिंदे गटाकडे तीन लाख शिवसैनिकांच्या पाठिंब्याचा पुरावा जमा होईल. शिवसेना पक्ष आणि चिन्हासाठी निवडणूक आयोगाच्या कोर्टात सुरु असलेल्या लढाईत हा पुरावा निर्णायक ठरण्याची शक्यता आहे. प्रत्येक अर्जदाराकडून दोन रुपयांचे शुल्क आकारले जात आहे.

 

हायलाइट्स:

  • बीकेसी मैदानावरच शिंदे गट पुरावे गोळा करणार
  • प्रत्येक अर्जदाराकडून दोन रुपयांचे शुल्क वसूल केले जात आहे
मुंबई: उद्धव ठाकरे यांना आव्हान देत बीकेसी मैदानावरील दसरा मेळावा यशस्वी करण्यासाठी शिंदे गटाने आपली संपूर्ण ताकद पणाला लावली आहे. या मेळाव्यासाठी तब्बल तीन लाखांची गर्दी बीकेसी मैदानावर जमेल, असा अंदाज आहे. हीच संधी साधत एकनाथ शिंदे यांनी निवडणूक आयोगाच्या कोर्टातील लढाईसाठी खोऱ्याने पुरावे जमवण्याची योजना आखल्याची माहिती समोर आली आहे. शिंदे गटाच्या दसरा मेळाव्यासाठी बीकेसी मैदानावर येणाऱ्या प्रत्येक कार्यकर्त्याकडून सदस्य नोंदणीचे अर्ज भरून घेणार जाणार आहेत. बीकेसी मैदान परिसरात येताच हे अर्ज कार्यकर्त्यांच्या हातात ठेवले जात आहेत. त्यामुळे आज एकाच दिवसात शिंदे गटाच्या शिवसेनेत लाखोंच्या संख्येने सदस्य नोंदणी होण्याची शक्यता आहे. त्यानंतर हेच अर्ज निवडणूक आयोगापुढे सादर करुन शिंदे गट आम्हीच खरी शिवसेना हा दावा आणखी बळकट करेल.
काय तो थाट, काय तो सोफा, काय ती व्हॅनिटी व्हॅन, शिंदे गटाचा दसरा मेळावा एकदम ओक्केमध्ये
शिंदे गटाकडून बीकेसी मैदानावर वितरीत करण्यात येणाऱ्या या अर्जावर शिवसेना पक्षाचे नवा आणि धनुष्यबाण हे चिन्ह आहे. एका बाजुला बाळासाहेब ठाकरे आणि आनंद दिघे यांची प्रतिमा आहे. तर दुसऱ्या बाजूला मुख्यमंत्री एकनाथ शिंदे यांचे छायाचित्र आहे. प्राथमिक सदस्य नोंदणी अर्जातील मजकूरही काळजीपूर्वक लिहण्यात आला आहे. वंदनीय हिंदूहृदयसम्राट शिवसेनाप्रमुख बाळासाहेब ठाकरे यांच्या हिंदुत्वाच्या विचाराने व धर्मवीर आनंद दिघे यांच्या विचाराने प्रेरित होऊन, मी शिवसेना पक्षाचा प्राथमिक सदस्य होऊ इच्छितो. मी शिवसेनेची घटना आणि नियम यांच्याशी प्रामाणिक राहण्याचे वचन देतो. मी शिवसेनेचे मुख्य नेते एकनाथजी शिंदे यांच्या आदेशाचे पूर्णपणे पालन करेन. मी इतर कोणत्याही पक्षाचा सदस्य नाही, असा मजकूर शिंदे गटाकडून वितरीत करण्यात आलेल्या प्राथमिक सदस्य नोंदणी अर्जावर लिहला आहे. शिंदे गटाने दावा केल्याप्रमाणे बीकेसीवरील दसरा मेळाव्यासाठी खरोखरच तीन लाख कार्यकर्ते जमले तर आजच्या आज शिंदे गटाकडे तीन लाख शिवसैनिकांच्या पाठिंब्याचा पुरावा जमा होईल. शिवसेना पक्ष आणि चिन्हासाठी निवडणूक आयोगाच्या कोर्टात सुरु असलेल्या लढाईत हा पुरावा निर्णायक ठरण्याची शक्यता आहे.
Dasara Melava: शिंदे गटाच्या दसरा मेळाव्यापूर्वी रंगली ‘त्या’ दोन तलवारींची चर्चा

बाहेरून आलेल्या कार्यकर्त्यांसाठी बीकेसी मैदानावर खास किचन

शिंदे गटाच्या दसरा मेळाव्यासाठी मुंबईबाहेरील कार्यकर्ते आणि नेते बीकेसी मैदानावर दाखल व्हायला सुरुवात झाली आहे. आज पहाटेपासूनच लांबच्या अंतरावरील शिंदे गटाचे कार्यकर्ते बसेसमधून बीकेसी परिसरात दाखल झाले. या सर्वांच्या खाण्यापिण्याची कोणत्याही प्रकारे आबाळ होणार नाही, याची पुरेपूर काळजी मुख्यमंत्री एकनाथ शिंदे यांनी घेतली आहे. त्यासाठी बीकेसी मैदानावर भव्य किचन उभारण्यात आले आहे. याठिकाणी सकाळचा नाश्ता आणि दुपारचे जेवण तयार केले जात आहे. शिंदे गटाच्या कार्यकर्त्यांसाठी वडापावची तीन लाख पॅकेटस्, गुलाबजाम आणि १० हजार किलो मसालेभात तयार केला जात आहे. भल्या पहाटे बीकेसी मैदानावर दाखल झालेल्या कार्यकर्त्यांना चहा आणि नाश्ता देण्यात आला. नाश्ता घेण्यासाठी कार्यकर्त्यांनी मोठी गर्दी केल्याचे दिसून आले.

जवळच्या शहरातील बातम्या

Marathi News App: तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? सिटिझन रिपोर्टर अॅप डाउनलोड करा आणि रिपोर्ट्स पाठवा.

LEAVE A REPLY

Please enter your comment!
Please enter your name here