अमित मिलिंद सरोदे (वय २१, रा. जनता वसाहत, पर्वती) असे खून झालेल्या तरुणाचे नाव आहे. या प्रकरणी त्याचा मित्र सौरभ महेश मोहोळ (वय २१, रा. लक्ष्मीनगर, पर्वती) याने तक्रार दिली आहे. त्यानुसार आदर्श ननावरे, बोंबल्या आणि यशवंत कांबळे यांच्यावर खुनाचा गुन्हा दाखल करण्यात आला आहे. पोलिसांनी दिलेल्या माहितीनुसार, तक्रारदार सौरभ हा अमितसोबत रविवारी रात्री पावणे अकराच्या सुमारास शाहू वसाहत येथील बालाजी होलसेल येथे थांबले होते. त्यावेळी आरोपी ननावरे हा त्याच्या साथीदारासोबत त्या ठिकाणी आला. त्याने थेट अमित याच्यावर पिस्तुलातून गोळीबार केला. तसेच, त्याच्या साथीदारांनी अमितच्या मानेवर, डोक्यात कोयत्याने वार केले.
यशवंत कांबळे याच्या सांगण्यावरून आरोपींनी गोळीबार व कोयत्याने वार केले आहेत. पुर्ववैमनस्यातून हा प्रकार घडला असल्याचा संशय पोलिसांनी व्यक्त केला आहे. या घटनेनंतर नागरिकांनी तत्काळ दत्तवाडी पोलिसांना माहिती दिली. माहिती मिळताच पोलिसांनी घटनास्थळी धाव घेतली. पण, तोपर्यंत आरोपी पसार झाले होते. आरोपींचा माग काढण्यासाठी स्थानिक व गुन्हे शाखेची पथके रवाना झाली आहेत. या प्रकरणी वरिष्ठ निरीक्षक देविदास घेवारे हे अधिक तपास करत आहेत.
दरम्यान, महंमदवाडीतील वाडकरमळा लक्ष्मीपार्क येथील जंगलात निर्जनस्थळी एका पंचवीस वर्षाच्या तरुणाचा दगडाने ठेचून खून केल्याचा प्रकार शुक्रवारी उघडकीस आला. मृतदेहावर छोटे छोटे दगड ठेवून थडगे केल्याप्रमाणे हा मृतदेह लपवून ठेवण्यात आला होता. मृतदेह कुजून दुर्गंधी पसरल्याने परिसरातील नागरिकांना याबद्दल माहिती झाली. माहिती समजताच वानवडी पोलिसांनी घटनास्थळी धाव घेऊन मृतदेह शवविच्छेदनासाठी रुग्णालयात पाठवला. या प्रकरणी वानवडी पोलिस ठाण्यात अज्ञात आरोपीविरोधात गुन्हा दाखल करण्यात आला.
Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times
