congress balasaheb thorat memes, बाळासाहेबांची शिवसेना….मीम्सचा पाऊस पडल्यानंतर थोरातही असं काही बोलले की सर्वजणच हसून लोटपोट – congress leader balasaheb thorat reaction on memes abouth cm eknath shinde new party balasahebanchi shivsena
मुंबई : शिवसेनेतील वर्चस्वावरून सुरू असलेल्या लढाईत अखेर पक्षाची दोन गटांमध्ये विभागणी झाली आहे. उद्धव ठाकरे यांच्या नेतृत्वाखालील पक्षाला शिवसेना उद्धव बाळासाहेब ठाकरे असं तर मुख्यमंत्री एकनाथ शिंदे यांच्या पक्षाला बाळासाहेबांची शिवसेना असं नाव निवडणूक आयोगाकडून देण्यात आलं आहे. शिवसेनेत पडलेल्या फुटीनंतर दोन्ही गट एकमेकांवर शाब्दिक हल्ले करत आहेत. एकनाथ शिंदे यांच्या पक्षाला बाळासाहेबांची शिवसेना हे नाव तर मिळालं खरं, मात्र शिंदेंच्या पक्षाच्या नावात असलेले बाळासाहेब नेमके कोणते? बाळासाहेब देवरस की बाळासाहेब थोरात? असा खरपूस सवाल उद्धव ठाकरे यांच्या गटातील कार्यकर्त्यांकडून करण्यात येत आहे. याबाबतचे मीम्सही सोशल मीडियावर चांगलेच व्हायरल झाले आहेत. या पार्श्वभूमीवर काँग्रेस नेते आणि राज्याचे माजी महसूलमंत्री बाळासाहेब थोरात यांनी मिश्किल टिपण्णी केली आहे.
एकनाथ शिंदे यांच्या पक्षाच्या नव्या नावाबाबत सुरू असलेल्या चर्चेवर तुमचं काय म्हणणं आहे, असा प्रश्न बाळासाहेब थोरात यांना पत्रकारांकडून विचारण्यात आला. त्यावर थोरात म्हणाले की, ‘ही बाळासाहेब थोरातांची शिवसेना असेल आणि त्यांनी माझ्या फोटोचा वापर केला तर मला रॉयल्टी घ्यावी लागेल.’ थोरात यांनी दिलेल्या या मजेशीर प्रतिक्रियेनंतर त्यांच्यासोबत असलेल्या कार्यकर्त्यांनाही हसू आवरता आलं नाही. उद्धव ठाकरेंना नवं चिन्ह मिळालं, दुसऱ्याच दिवशी मराठवाड्यात मशाल पेटली, नांदेडमधून विजयी सलामी
सोशल मीडियावर काय आहे चर्चा?
एकनाथ शिंदे यांनी आमदार आणि खासदारांसह केलेल्या बंडानंतर उद्धव ठाकरे समर्थक संतप्त झाले आहेत. गद्दारांनी माझ्या वडिलांचं नाव न वापरता स्वत:च्या वडिलांचं नाव वापरावं, असं आव्हान देत उद्धव यांच्याकडून वारंवार शिंदे आणि त्यांच्या गटातील इतर नेत्यांना डिवचलं जातं. त्यातच निवडणूक आयोगाने शिंदे यांच्या पक्षासाठी बाळासाहेबांची शिवसेना हे नाव वापरण्यास मंजुरी दिली. दुसरीकडे उद्धव यांच्या पक्षनावात मात्र शिवसेना उद्धव बाळासाहेब ठाकरे असा पूर्ण उल्लेख आहे. त्यामुळे बाळासाहेब ठाकरे तर एकच आहेत आणि ते उद्धव ठाकरे यांच्याकडे आहेत, मग तुमच्याकडे असलेले बाळासाहेब कोणते, असा खोचक सवाल ठाकरे गटाचे कार्यकर्ते एकनाथ शिंदे यांना विचारत आहेत. कालपासून बाळासाहेब देवरस, बाळासाहेब आंबेडकर आणि बाळासाहेब थोरात अशा विविध नेत्यांसोबत एकनाथ शिंदे यांचा फोटो आणि त्यांच्या पक्षाचं नाव जोडत सोशल मीडियावर मीम्स व्हायरल करण्यात आले आहेत.
दरम्यान, शिवसेनाप्रमुख दिवंगत बाळासाहेब ठाकरे यांच्या विचारापासून जे दूर गेले आहेत, तेच लोक बाळासाहेब कोणते, असा खोडसाळ प्रश्न विचारत आहेत, असं प्रत्युत्तर शिंदे गटाकडून देण्यात आलं आहे.
उद्धव ठाकरेंना नवं चिन्ह मिळालं, दुसऱ्याच दिवशी मराठवाड्यात मशाल पेटली, नांदेडमधून विजयी सलामी
