uddhav thackeray, ठाकरेंसोबत ठामपणे उभ्या राहिलेल्या पदाधिकाऱ्याला पोलिसांचा आणखी एक धक्का – airoli rabale police registered another case against uddhav thackeray supporter and former corporator of shivsena m k madhavi

नवी मुंबई : मुंबई उपनगर व ठाणे या दोन जिल्ह्यांतून दोन वर्षांसाठी हद्दपार करण्यात आलेले ऐरोलीतील शिवसेनेचे माजी नगरसेवक एम. के. मढवी यांच्याविरोधात रबाळे पोलिसांनी आणखी एक गुन्हा दाखल केला आहे. मढवी यांना ३० सप्टेंबर रोजी हद्दपारीच्या आदेशाची प्रत देण्यासाठी गेलेल्या पोलिसांसमोर मढवी यांनी आरडा-ओरड करून ती घेण्यास नकार दिला. तसंच, पोलिसांची अडवणूक करून त्यांना कायदेशीर काम करू दिलं नाही, असा आरोप आहे. त्यामुळे पोलिसांनी त्यांच्याविरोधात सरकारी कामात अडथळा आणून धमकी दिल्याप्रकरणी गुन्हा दाखल केला आहे.

रबाळे पोलिसांनी पाठविलेल्या प्रस्तावानंतर परिमंडळ-१ चे पोलीस उपायुक्त विवेक पानसरे यांनी शिवसेनेचे ऐरोलीतील माजी नगरसेवक एम. के. मढवी यांना ७ ऑक्टोबर रोजी ठाणे व मुंबई उपनगरे या जिल्ह्यांतून दोन वर्षांसाठी हद्दपार केलं आहे. मढवी यांना हद्दपार करण्यापूर्वी त्यांना हद्दपारीचे आदेश बजावण्यासाठी रबाळे पोलीस ठाण्यातील सहाय्यक पोलीस निरीक्षक दीपक खरात व त्यांचे पथक ३० सप्टेंबर रोजी रात्री ११ वाजताच्या सुमारास ऐरोलीतील मजुद्दीन शाळेसमोरील मैदानात आयोजित नवरात्रोत्सवाच्या ठिकाणी गेले होते.

बायको सरपंच तर नवरा उपसरपंच, स्मार्ट गावचा कारभार पत्नी पत्नीच्या हातात!

पोलीस आल्यानंतर मढवी यांनी नवरात्रोत्सवासाठी जमलेल्या जमावासमोर धमकीवजा आरडा-ओरड केली. तसंच, त्यांनी कार्यकर्ते व महिलांना पुढे करून हद्दपार आदेशाची प्रत घेण्यास नकार देत पोलिसांची अडवणूक करून त्यांना शासकीय कायदेशीर काम करू दिले नाही. त्यामुळे सहाय्यक पोलीस निरीक्षक दीपक खरात यांनी स्वत: फिर्यादी होऊन एम. के. मढवी यांच्याविरोधात सरकारी कामात अडथळा आणून धमकी दिल्याप्रकरणी गुन्हा दाखल केला आहे.