देशात करोनाने गाठला नवा उच्चांक; रुग्णसंख्या पोहचली ९ लाखांवर

नवी दिल्लीः देशातील करोना रुग्णांची एकूण संख्या ही आता ९ लाखांवर गेलीय. तर २३ हजार ५०० जणांचा करोनाने मृत्यू झाला आहे. सोमवारी सकाळी आठ वाजेपर्यंतच्या रिपोर्टनुसार देशातील करोना व्हायरसचे नवीने २८, ७०१ रुग्ण आढळून आले. यामुळे देशातील करोना रुग्णांची संख्या ही ८, ७८, २५४ इतकी झाली. पण फक्त १२ तासांत देशातील करोना रुग्णांची संख्याही ९ लाखांवर गेली आहे.

महाराष्ट्रात करोनाचे एकूण बळी १० हजारांवर

महाराष्ट्रात गेल्या २४ तासांत करोनाचे ६४९७ नवे रुग्ण आढळून आले आहेत. यानुसार करोना बाधित रुग्णांची संख्या ही २,६०, ९२४ इतकी झाली आहे. तर १९३ जणांचा मृत्य झाला आहे. यामुळे महाराष्ट्रातील करोनाने मृत्यू झालेल्यांची संख्याही १०, ४८२ इतकी झाली आहे.

तामिळनाडूत करोना रुग्णांची एकूण संख्या दीड लाखाजवळ

तामिळनाडूत सोमवारी करोनाचे ४, ३२८ नवे रुग्ण आढळून आले. तर ६६ जणांचा करोनाने बळी घेतला. तामिळनाडूत सोमवारी ३०३५ जण करोनामुक्त झाले. त्यांना डिस्चार्ज देण्यात आला. यानुसार तामिळनाडूतील करोना रुग्णांची एकूण संख्या ही १, ४२, ७८९ इतकी झाली आहे. यापैकी ९२, ५६७ जण करोनामुक्त झाले आहेत. तर सध्या ४८, १९६ जणांवर उपचार सुरू आहेत. तामिळनाडूत करोनाने एकूण २०३२ जणांचा मृत्यू झाला आहे.

कर्नाटकात गेल्या २४ तासांत करोनाचे २७३८ नवीन रुग्ण आढळून आले आहेत. यापैकी १३१५ रुग्ण हे फक्त बेंगळुरूतील आहेत. तर ७३ जणांचा करोनाने मृत्यू झाला आहे. दुसरीकडे गेल्या २४ तासांत ८३९ जण करोनामुक्त झाल्याने त्यांना डिस्चार्ज देण्यात आला.

राजधानी दिल्लीत गेल्या २४ तासांत करोनाचे १२४६ नवीन रुग्ण समोर आले आहेत. तर ४० रुग्णांचा मृत्यू झाला आहे. दिल्लीतील करोना रुग्णांची एकूण संख्या १, १३, ७४० इतकी झाली आहे. करोनाने दिल्लीत एकूण ३४११ जणांचा मृत्यू झाला आहे. पण करोनामुक्त होणाऱ्यांची संख्याही जास्त आहे. दिल्लीत करोना रुग्ण बरे होण्याचे प्रमाण हे ८०.२८ टक्के इतके आहे.

आंध्र प्रदेशात गेल्या २४ तासांत १९३५ नवीन रुग्ण आढळलेत. तर ३६ जणांचा करोनाने मृत्यू झाला आहे. बिहारमध्येही गेल्या २४ तासांत १११६ जण करोना पॉझिटिव्ह आढळून आले आहेत. बिहारमधील रुग्णांची एकूण संख्याही १७, ४२१ इतकी झाली आहे. राजस्थानमध्ये गेल्या २४ तासांत १४३५ नवीन रुग्ण आढळले आहेत. तेलंगणमध्ये १५५० नव्या रुग्णांची नोंद झाली आहे.