पुणे: पुण्यातील एक व्हिडीओ सोशल मीडियावर व्हायरल झाला आहे. हा व्हिडीओ एका बसमधील आहे. एक प्रवासी बसमध्ये आरडाओरडा करताना दिसत आहे. मला वाचवा, चालक माझं अपहरण करत आहे, अशी आरडाओरड प्रवाशाकडून सुरू आहे. बस चालक उतरू देत नसल्यानं प्रवाशानं बोंबाबोंब केली. त्यावेळी बसमधील प्रवाशानं व्हिडीओ चित्रित केला. तो आता सोशल मीडियावर व्हायरल झाला आहे.
पीएमपीएमएलच्या बसमध्ये हा प्रकार घडला. ही बस चिंचवडहून बालेवाडीला जात होती. दोन स्टॉपच्या मध्ये एका ठिकाणी बस थांबली. त्यावेळी एका प्रवाशानं दरवाजा उघडण्यास सांगितलं. त्यावर बसचा दरवाजा केवळ स्टॉपवरच थांबेल असं उत्तर चालकानं दिलं. त्यावरून दोघांमध्ये वाद सुरू झाला. हे प्रकरण पुढे शिवीगाळ करण्यापर्यंत पोहोचलं.
प्रवासी बस चालकाला शिवीगाळ करू लागला. डॅशबोर्डवर हात मारू लागला. बसमधील इतर प्रवाशांनी त्याला शांत राहण्यास सांगितलं. मात्र तो काही ऐकेना. त्यानं आरडाओरडा करण्यास सुरुवात केली. ‘ओ वाचवा, बस चालक त्रास देतोय. उतरु देत नाही. चालक अपहरण करतोय,’ अशी आरडाओरड प्रवाशानं केली. त्याचा आवाज ऐकून आसपासचे लोक बसजवळ गोळा झाले. यानंतर चालकानं बस सुरू केली आणि ती थेट स्टॉपवरच थांबवली.
