काँग्रेसचे नवनिर्वाचित अध्यक्ष मल्लिकार्जुन खरगे हे लवकरच मुंबई महानगरपालिका निवडणुकीच्या कामांचा आढावा घेणार आहेत. येत्या महिनाभरात खरगे मुंबई दौऱ्यावर येण्याची शक्यता वर्तविली जात असून
हायलाइट्स:
- स्वबळावर लढवण्याबाबत चाचपणी करणार
- मुंबई काँग्रेसच्या नेत्यांच्या भेटीत दिले संकेत
- पक्षाच्या कामांचाही आढावा घेण्याची चिन्हे
मुंबई काँग्रेसचे अध्यक्ष भाई जगताप यांच्या अध्यक्षतेखालील एका शिष्टमंडळाने नुकतीच मल्लिकार्जुन खरगे यांची भेट घेतली होती व त्यांचे अभिनंदन करीत त्यांना मुंबई भेटीचे निमंत्रण दिले होते. या भेटीदरम्यानच खरगे यांनी आगामी मुंबई महानगरपालिका निवडणुकीच्या दृष्टिकोनातून महाराष्ट्रातील नेते मंडळींशी चर्चा केली. त्यामुळे मुंबई काँग्रेसने देखील याबाबत पावले उचलण्यास सुरुवात केली आहे. सध्या मुंबई महानगरपालिकेत काँग्रेसचे किती नगरसेवक कार्यरत होते, याची माहिती या भेटीत खरगे यांनी जाणून घेतली. त्याशिवाय मुंबई महानगरपालिका निवडणुकीच्या अनुषंगाने मुंबई काँग्रेसने कोणत्या कामांना सुरुवात केली आहे, याबाबतही त्यांनी संबंधित नेत्यांशी चर्चा केल्याचे कळते. सध्या राज्यातील सत्तासंघर्षाचा मुंबई काँग्रेसला फटका बसेल का, याबाबतही खरगे यांनी ज्येष्ठ नेत्यांकडून माहिती घेतल्याचे समजते. या निवडणुकीसाठी मुंबई काँग्रेसकडून किती इच्छुक उमेदवार आहेत व त्यानुसार त्यांच्या तयारीचा आढावाही खरगे यांनी घेतल्याचे समजते.
गेल्या काही दिवसांपासून मुंबई काँग्रेसमधील अंतर्गत गटबाजीही अनेक कारणांमुळे समोर आली होती. त्याचा फटका मुंबई काँग्रेसला मुंबई महापालिका निवडणुकीत बसेल का, याबाबतही खरगे यांनी या नेत्यांशी चर्चा केल्याचे कळते. त्यामुळे लवकरच मल्लिकार्जुन खरगे हे मुंबईत कार्यक्रमांच्या निमित्ताने दाखल होणार असून, या सर्व बाबींवर सविस्तर माहिती घेऊन पुढील दिशा ठरविणार असल्याची माहिती मुंबई काँग्रेसच्या एका बड्या नेत्याने ‘मटा’शी बोलताना दिली.
जवळच्या शहरातील बातम्या
Marathi News App: तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? सिटिझन रिपोर्टर अॅप डाउनलोड करा आणि रिपोर्ट्स पाठवा.
