माई क्‍याओलिंगला एका वृद्ध जोडप्याने दत्तक घेतलं होतं. तिच्या (दत्तक) भावाचं लग्न झाल्यानंतर माईची वहिनी तिच्यासाठी दुःस्वप्न ठरली. “ती माझ्यापेक्षा १८ वर्षांनी मोठी होती, आणि ती अनेकदा मला मारहाण करायची. माझ्या घरच्यांकडे कधीच मदत मागण्याची हिंमत झाली नाही.” असं माई सांगायची. सुदैवाने, वांग लिंग्झियाने अनेकदा तिला मदतीचा हात दिला. एकमेकींची काळजी घेत दोघींची मैत्री बहरत गेली. लग्नानंतरही त्या कायम एकमेकींच्या संपर्कात राहिल्या.
अनपेक्षितपणे, २००० मध्ये वांग लिंग्झियाच्या पतीचा आजारपणामुळे मृत्यू झाला आणि कुटुंबाचा भार एकट्या तिच्यावर पडला. पुढे, २००४ मध्ये माई क्‍याओलिंगला स्तनाचा कर्करोग झाल्याचे निदान झाले. वांग लिंग्झियाने तिची सेवासुश्रुषा केली. एके दिवशी, माईने तिला आपल्या नातेवाईकांचा शोध घेण्याचं सुचवलं. तिला डीएनए चाचणी करण्याचीही कल्पना सुचली. कदाचित आपण जुळ्या असू, असं ती म्हणाली. अनेक जण नेहमी म्हणतात की आपण सारख्या दिसतो, असा माईचा युक्तिवाद. परंतु वांग लिंग्झियाला ही गोष्ट अशक्यप्राय वाटली. कारण दोघींच्या जन्म तारखाही वेगवेगळ्या होत्या, परंतु कॅन्सरग्रस्त मैत्रिणीच्या शब्दाचा मान राखण्यासाठी वांगने सहमती दर्शवली आणि त्याचे निष्कर्ष डोळे विस्फारणारे होते. त्या दोघी खरंच जुळ्या बहिणी होत्या.
यानंतर वांग लिंग्झिया आणि माई क्‍याओलिंग यांनी त्यांच्या जैविक पालकांना शोधण्याचा निर्णय घेतला, त्यांनी केवळ इंटरनेटवर माहिती अपलोड केली नाही, तर अनेक फॅमिली सर्च अॅक्टिव्हिटीजमध्ये भाग घेतला, परंतु त्याला यश आलं नाही. २००९ मध्ये जिया झुईकिंग नावाच्या माणसाने त्यांच्याशी संपर्क साधला.
बहिणींच्या शोध मोहिमेचे फोटो
आपण लहान असतानाच दत्तक गेल्याचा खुलासा त्याने केला होता, पण त्याचे मूळ कुटुंबाशी संपर्क होता. माई आणि वांग या दोघी बहिणींचे फोटो पाहिल्यावर त्याला आपलं मूळ कुटुंब आणि त्या बहिणींमध्ये थोडंसं साम्य वाटलं. त्यांच्याशी आपलं रक्ताचं नातं असल्याचा संशय त्याला आला. जिया झुईकिंगच्या प्रयत्नांना यश आलं. तिघांची ओळख पटली. तो वांग आणि माई यांचा सख्खा मोठा भाऊ होता. त्याचा जन्म १८ जून १९५५ चा होता.
जिया झुईकिंग यांनी सांगितले की त्यांचे जैविक वडील (ज्यांचं मूळ आडनाव जू) यांना तीन मुले आणि तीन मुली होत्या. सुरुवातीच्या काळात, कौटुंबिक आर्थिक अडचणींमुळे, त्यांना जुळ्या बहिणींसह चार मुलांना दत्तक द्यावे लागला. आता मुलींचे आई-वडील हयात नाहीत, परंतु मृत्यूपूर्वी त्यांना आपल्या दोन्ही मुलींना शोधायचं होतं.
हेही वाचा : जगातील सर्वात ‘गलिच्छ’ व्यक्तीचा मृत्यू, ६७ वर्षांत एकदाही आंघोळ नाही, चक्रावणारं कारण
शेवटी, वांग लिंग्झिया आणि माई क्‍याओलिंग यांनी १८ नोव्हेंबर २०११ रोजी जिआंगसूला जाण्यासाठी ट्रेन पकडली आणि कुटुंबातील इतर सदस्यांसोबत त्या पुन्हा एकत्र आल्या. सहा जणांचा फॅमिली फोटो त्यांनी काढला, मोठा भाऊ झू देगोंग, दुसरा भाऊ जिया झुईकिंग, तिसरी बहीण जू जूफेंग, चौथा भाऊ जू झ्युमिंग आणि पाचवी बहीण माई क्‍याओलिंग आणि सहावी बहीण वांग लिंग्झिया असा भावंडांचा हसरा फॅमिली फोटो अखेर जुळून आला.
हाच तो फॅमिली फोटो
