Maharashtra Politics | एनसीबीचे माजी विभागीय संचालक समीर वानखेडे राजकारणाच्या मैदानात उतरण्याची शक्यता. वाशिम जिल्ह्यातील एका वृत्तपत्रात समीर वानखेडे आणि त्यांची पत्नी क्रांती रेडकर (Kranti Redkar) यांच्या दिवाळीच्या शुभेच्छा देणारी जाहिरात सध्या प्रचंड चर्चेचा विषय ठरत आहे. वृत्तपत्राच्या एका संपूर्ण पानावर समीर वानखेडे आणि क्रांती रेडकर यांचे छायाचित्र झळकत आहे.
हायलाइट्स:
- वाशिम जिल्ह्यातील वरुड तोफा हे समीर वानखेडे यांचे मूळ गाव आहे
- समीर वानखेडें राजकारणात येणार?
- वाशिम जिल्ह्यात चर्चेला उधाण
क्रांती रेडकर आणि समीर वानखेडेंच्या घरी पोहोचले केंद्रीय मंत्री; काय होतं निमित्त?वाशिम जिल्ह्यातील वरुड तोफा हे समीर वानखेडे यांचे मूळ गाव आहे. माजी मंत्री नवाब मलिक यांनी समीर वानखेडेंच्या जात अनुसूचित जातीच्या प्रमाणपत्रावर आक्षेप घेतल्या नंतर वानखेडे यांनी आपल्या मूळ गावाशी संबंध जोडत आपले कुटुंबीय अजूनही वरुड तोफा गावात राहत असल्याचे सांगितले होते. तेव्हा त्यांना जिल्ह्यातून मोठे समर्थन मिळाले होते. विशेषतः वरुड तोफा गावच्या नागरिकांनी समीर वानखेडे यांच्या समर्थनार्थ मोर्चाही काढला होता. मध्यंतरी समीर वानखेडे हे आपल्या मूळ गावी तीन दिवस मुक्कामीही आले होते. जात पडताळणी समितीने वानखेडे यांचे महार जातीचे जात वैधता प्रमाणपत्र वैध ठरवल्याने त्यांना मोठा दिलासा मिळाला होता. मात्र, आता त्यांनी दिलेल्या दिवाळीच्या शुभेच्छाने ते राजकारणात येणार का, अशी चर्चा होतेय. कारण वाशीम जिल्यातील वाशीम – मंगरुळपीर हा मतदार संघ अनुसूचित जातीसाठी राखीव आहे. येथून भाजपचे लखन मलिक हे सातत्याने निवडून येत आहेत. हा मतदार संघ भाजपचा बालेकिल्ला आहे. समीर वानखेडे यांचा जात प्रमाणपत्राचा अडथळा दूर झाल्याने ते येथून निवडणूक लढवणार का, याबाबत जिल्ह्यात चर्चा सुरु झाली आहे.
आणखी एक क्लीनचीट! समीर वानखेडे मुस्लीम नाहीत, जात पडताळणी समितीचा निष्कर्ष
समीर वानखेडे यांची एनसीबीच्या विभागीय संचालकपदाची कारकीर्द प्रचंड गाजली होती. समीर वानखेडे यांच्या नेतृत्वाखाली एनसीबीने मुंबईतील ड्रग्ज रॅकेट मोडून काढण्यासाठी अनेक कारवाया केल्या होत्या. या काळात एनसीबीने अनेक बॉलीवूड सेलिब्रिटींचीही चौकशी केली होती. विशेषत: कॉर्डिलिया क्रुझवर समीर वानखेडे यांच्या नेतृत्त्वाखाली करण्यात आलेली कारवाई प्रचंड गाजली होती. यावेळी समीर वानखेडे यांच्या पथकाने बॉलीवूड किंग शाहरुख खान याचा मुलगा आर्यन खानला ड्रग्ज बाळगल्याप्रकरणी अटक केली होती. त्यामुळे आर्यन खान अनेक दिवस तुरुंगात होता. मात्र, नंतरच्या काळात नवाब मलिक यांनी या संपूर्ण प्रकरणाची पाळेमुळे खोदून काढत ही कारवाई म्हणजे केवळ एक बनाव असल्याचे दाखवून दिले होते. त्यामुळे लाईमलाईटमध्ये असलेल्या समीर वानखेडे आणि एनसीबीला प्रचंड मोठ्या नामुष्कीला सामोरे जावे लागले होते. एनसीबीने याप्रकरणात आर्यन खानवरील सर्व आरोपही मागे घेतले होते. तसेच समीर वानखेडे यांच्या नवी मुंबईतील अवैधरित्या मिळवलेल्या बार परवान्याचे प्रकरणही उजेडात आले होते. या सगळ्यानंतर समीर वानखेडे यांची एनसीबीच्या विभागीय संचालकपदावरून उचलबांगडी करण्यात आली. तेव्हा वानखेडे यांची रवानगी चेन्नई येथे भारतीय महसूल सेवा (IRS) विभागात करण्यात आली होती.
Marathi News App: तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? सिटिझन रिपोर्टर अॅप डाउनलोड करा आणि रिपोर्ट्स पाठवा.
