coronavirus, दिलासादायक! करोनाविरुद्धच्या लढ्यात भारताला सर्वात मोठं यश; तब्बल ३२ महिन्यांनंतर ‘असं’ घडलं – india records zero covid 19 death in past 24 hours first time since march 2020

देशात आतापर्यंत ४ कोटी ४६ लाख ६२ हजार १४१ जणांना करोनाची लागण झाली आहे. सध्याच्या घडीला १४ हजार २१ करोना रुग्णांवर उपचार सुरू आहेत. देशात करोनामुळे ५ लाख ३० हजार ५०९ जणांचा मृत्यू झाला आहे. ९ एप्रिल २०२० रोजी देशात करोनाचे ६४० रुग्ण आढळून आले होते. त्यापेक्षा कमी रुग्ण काल देशात आढळून आले. मार्च २०२० नंतर प्रथमच देशात एकाही करोना रुग्णाचा मृत्यू झालेला नाही. करोना रुग्ण बरं होण्याचं प्रमाण ९८.७८ टक्क्यांवर पोहोचलं असल्याची आकडेवारी आरोग्य मंत्रालयानं दिली.
चीन, पाकिस्तान जगावर आणणार मोठं संकट; रावळपिंडीतील सीक्रेट लॅबमध्ये चाललंय काय?
करोनातून बऱ्या झालेल्या रुग्णांची संख्या ४ कोटी ४१ लाख १७ हजार ६११ वर पोहोचली आहे. तर करोनामुळे मृत्यूमुखी पडलेल्यांचं प्रमाण १.१९ टक्के इतकं आहे. देशातील करोना रुग्णांचा आकडा ७ ऑगस्ट २०२० रोजी २० लाखांवर गेला. २३ ऑगस्टला हाच आकडा ३० लाखांचा टप्पा ओलांडून पुढे गेला. ५ सप्टेंबरला करोना रुग्णांची संख्या ४० लाखांच्या पुढे गेली. १६ सप्टेंबरला हाच आकडा ५० लाखांचा टप्पा ओलांडला. करोना रुग्णांचा आकडा २८ सप्टेंबरला ६० लाखांच्या पुढे सरकला. ११ ऑक्टोबरला रुग्णसंख्येनं ७० लाखांचा टप्पा ओलांडला. ८० लाख रुग्णसंख्येचा आकडा २९ ऑक्टोबरला ओलांडला गेला. २० नोव्हेंबरला ९० लाख, तर एक कोटीचा आकडा १९ डिसेंबरला ओलांडला गेला.