ठाकरे सरकारमधील 'या' मंत्र्याचा पासपोर्ट अवैध; माजी आमदार कोर्टात

म.टा.विशेष प्रतिनिधी, नागपूर: चंद्रपूर जिल्ह्याचे पालकमंत्री व राज्याचे मदत व पुनर्वसन मंत्री यांनी २००७ मध्ये अवैधरित्या पासपोर्ट प्राप्त केला असून त्यांचा पासपोर्ट रद्द करण्यात यावा, अशी विनंती करणारी याचिका माजी आमदार मितेश भांगडीया यांनी मुंबई उच्च न्यायालयाच्या नागपूर खंडपीठासमोर सादर केली आहे. (vijay wadettiwar passport)

सदर याचिकेवर सुनावणी करताना उच्च न्यायालयाने राज्य सरकारच्या गृह मंत्रालय, नागपूर पोलिस आयुक्त, मुंबई व नागपूर येथील पासपोर्ट अधिकारी आणि विजय वडेट्टीवार यांना नोटीस बजावली असून त्यावर उत्तर सादर करण्याचा आदेश दिला आहे.

याचिकाकर्ते मितेश भांगडीया यांच्या वतीने बाजू मांडताना अॅड. श्रीरंग भांडारकर यांनी खंडपीठाला सांगितले की, विजय वडेट्टीवार यांनी २९ सप्टेंबर २००१ रोजी नागपूर पासपोर्ट कार्यालयात अर्ज केला होता. त्यावेळी त्यांनी त्यांच्याविरूद्धच्या फौजदारी गुन्ह्यांची माहिती दडपून ठेवली. त्यावेळी वडेट्टीवार यांच्याविरूद्ध १० फौजदारी गुन्हे होते, असा दावा याचिकेत केला आहे.

दरम्यान, पोलिसांकडून एक तपासणी अहवाल पासपोर्ट अधिकाऱ्यांना मिळाला. तेव्हा पासपोर्ट अधिकारी व्ही.बी. कांबळे यांना वडेट्टीवार यांच्याविरूद्धच्या प्रलंबित फौजदारी गुन्ह्यांची माहिती मिळाली. त्यावरून वडेट्टीवार यांनी त्यांच्याविरूद्धची गुन्ह्यांची माहिती लपवून ठेवली, असे स्पष्ट होते, असा दावा याचिकेत केला आहे. त्यानंतर वडेट्टीवार यांनी २५ जानेवारी २००७ रोजी पुन्हा एकदा पासपोर्टकरिता नागपूर कार्यालयात अर्ज केला. त्यात यापूर्वी केलेल्या अर्जाची माहिती देण्यात आली नाही. अर्जाच्या कलम १३ मध्ये पासपोर्टसाठी यापूर्वी अर्ज केला नव्हता, असे नमूद केले होते. या दुसऱ्या अर्जात देखील वडेट्टीवार यांनी त्यांच्याविरूद्धच्या फौजदारी प्रकरणांची माहिती दिली नाही, असा आरोप याचिकेत केला आहे. त्यानतंर १९ सप्टेंबर २००७ रोजी वडेट्टीवार यांनी त्यांच्याविरूद्ध गुन्हे प्रलंबित नसल्याचे शपथपत्र लिहून दिले. तसेच पोलिसांकडून नकारात्मक अहवहाल आल्यानंतरही केवळ शपथपत्राच्या आधारे वडेट्टीवार यांना १९ सप्टेंबर २००७ रोजी पासपोर्ट देण्यात आला. या नव्या पासपोर्टकरिता वडेट्टीवार यांनी त्यांचा मुंबईचा पत्ता दिला. त्या पत्त्यावर ते १० वर्षापासून राहत असल्याचे नमूद केले. वास्तविकता वडेट्टीवार यांचे मुळ निवास रामपूरी निवास, वॉर्ड क्रमांक ११, शिवाजी नगर पाटेगाव रोड गडचिरोली असा आहे. त्यावरून २००४ ते २००७ या कालावधीत ते गडचिरोलीत निवास करीत होते, असा दावा याचिकेत केला आहे.

शिक्षणासाठी घेतला पासपोर्ट

विदेशात उच्च शिक्षणासाठी जाणार आहे, असे कारण देत विजय वडेट्टीवार यांनी पासपोर्ट प्राप्त केला. परंतु, वडेट्टीवार हे केवळ दहावी पास आहेत. त्यामुळे त्यांनी उच्च शिक्षणासाठी विदेशात जाण्याचे खोटे कारण देत पासपोर्ट घेतला, असा आरोप याचिकेत केला आहे.