सोने झाले स्वस्त ; 'हा' आहे आजचा सराफातील भाव

मुंबई : उच्चांकी स्तरावर गेलेल्या सोन्यात नफावसुली सुरु आहे. यामुळे सोन्याच्या किमतीत घसरण झाली आहे. शुक्रवारी स्थानिक सराफा बाजारात सोन्याचा भाव ०.०४ टक्क्यांनी कमी झाला आणि ४८७५३ रुपयांपर्यंत खाली आला. त्याआधी गुरुवारी सोने ०.७५ टक्क्यांनी कमी झाले होते. अमेरिका आणि चीनमधील तणावाचे पडसाद कमॉडिटी बाजारावर उमटत असल्याचे विश्लेषकांचे म्हणणे आहे. शुक्रवारी चांदीच्या किमतीत ०.७ टक्क्यांची घसरण झाली. चांदीचा भाव ५२२५७ रुपये झाला.

एचडीएफसी सिक्युरिटीजनुसार सराफा बाजारात शुक्रवारी सोन्याच्या दरात घसरण झाली.काल सोने २७१ रुपयांनी स्वस्त झाले आणि भाव ४९७२९ रुपये झाला. चांदीच्या दरात मात्र ५१२ रुपयांची घसरण झाली आणि चांदीचा भाव किलोला ५३३८२ रुपये झाला. जागतिक बाजारात सोन्याचा भाव प्रती औंस १८०८ डॉलरवर गेला. त्यात ०.४८ टक्क्याची वाढ झाली. चांदीचा भाव ०.१६ टक्के वाढून १९.६१ डॉलर प्रती औंस झाला.

goodreturns.in या वेबसाईटनुसार आज शनिवारी मुंबईत २२ कॅरेट सोन्याचा भाव ४७४६० रुपये आहे. २४ कॅरेटचा भाव ४८४६० रुपये झाला आहे. त्यात ४० रुपयांची घसरण झाली आहे. तर चांदीचा भाव किलोला ५२३१० रुपये झाला आहे. त्यात शुक्रवारच्या तुलनेत ४९० रुपयांची घसरण झाली. दिल्लीत २२ कॅरेट सोनं ४७७१० रुपये आणि २४ कॅरेटचा भाव ४८९१० रुपये आहे. कोलकात्यात २२ कॅरेटचा भाव ४८२३० रुपये आणि २४ कॅरेटचा भाव ४९८१० रुपये आहे. कोलकात्यात सोने दर ५० हजारांखाली आला आहे. चेन्नईपाठोपाठ कोलकात्यात २४ कॅरेटचा भाव ५० हजारांवर गेला होता. आज चेन्नईत २२ कॅरेट सोन्याचा भाव ४६८६० रुपये आहे. २४ कॅरेटचा भाव ५११५० रुपये झाला आहे. त्यात ३२० रुपयांची घसरण झाली आहे.

देशातील करोना बाधितांची संख्या ९ लाखांवर गेली आहे. तर आतापर्यन्त २४ हजार नागरिकांनी आपला जीव गमावला आहे. अमेरिकेत करोनाबाधितांचा आकडा ३५ लाखांवर पोहोचला असून एक लाख ३८ हजार नागरिकांचा यात मृत्यू झाला आहे. अमेरिकेत करोनाच्या वाढत्या संसर्गाला ट्रम्प प्रशासन जबाबदार असल्याचा आरोप डेमोक्रेटीक पक्षाने केला असून सुरुवातीच्या टप्प्यात करोनाकडे दुर्लक्ष केल्यामुळे संसर्ग फैलावला असल्याचा आरोप करण्यात येत आहे.

वाचा :

अमेरिकेखालोखाल भारताने करोनाविषयक आरोग्य चाचण्या केल्या असल्याची माहिती व्हाइट हाऊसतर्फे शुक्रवारी देण्यात आली. अमेरिकेने आत्तापर्यंत चार कोटी २० लाख नागरिकांच्या करोना चाचण्या केल्या असून त्या खालोखाल भारताने एक कोटी २० लाख चाचण्या केल्या आहेत, अशी माहिती व्हाइट हाऊसच्या जनसंपर्क सचिव केली मॅकनेनी यांनी दिली.

ऑनलाइन गोल्ड मार्केट इन इंडिया या अहवालात वर्ल्ड गोल्ड कौन्सिलने कोव्हिड-१९ संसर्गाच्या काळातील दागिनेविक्रीचा अभ्यास केला. सराफांच्या दालनांत ग्राहकांचे येणे बंद झाल्यानंतर छोट्या सराफांपुढे अस्तित्वाचा प्रश्न उभा राहिला आहे. या परिस्थितीतून बाहेर येण्यासाठी काही सराफांनी ऑनलाइन विक्रीचा मार्ग स्वीकारला आहे. याचे प्रमाण सध्या अगदीच नगण्य, एक ते दोन टक्के असले तरी भावी काळात अशा प्रकारे दागिने आणि सोने-चांदी विक्रीवर अधिकाधिक भर दिला जाईल, असे कौन्सिलचे म्हणणे आहे.