उद्धव ठाकरे आणि प्रकाश आंबेडकर एका कार्यक्रमाच्या निमित्ताने एकत्र येणार असल्याची माहिती असताना, मुख्यमंत्री एकनाथ शिंदे यांनी दोन दिवसांपूर्वी डॉ. बाबासाहेब आंबेडकर यांचे निवासस्थान असलेल्या ‘राजगृह’ पाहणीच्या निमित्ताने आंबेडकर यांची भेट घेतली होती.
साडेचार महिन्यांपूर्वी एकनाथ शिंदे यांनी शिवसेनेतील ४० आमदार फोडत आपला गट हाच खरा शिवसेना पक्ष असल्याचा दावा केला. पक्षातील फुटीमुळे उद्धव ठाकरे यांना मोठा धक्का बसला आहे. या धक्क्यातून बाहेर पडत असताना ठाकरे यांच्याकडून नवे राजकीय मित्र जोडण्याचा प्रयत्न सुरू आहे. त्यातून वंचित बहुजन आघाडीचा पर्याय समोर आला आहे. ठाकरे यांना पक्षफुटीची मोठी झळ विदर्भ आणि मराठवाड्यात बसली. या दोन्ही भागात आंबेडकर यांची निर्णायक ताकद आहे. त्यामुळे वंचित आघाडी सोबत आल्यास दोघांनाही राजकीय लाभ होऊ शकतो. नजीकच्या काळात उद्धव ठाकरे आणि वंचित बहुजन आघाडी एकत्र येण्याची प्रक्रिया सुरू होणार किंवा कसे याचे संकेत आजच्या कार्यक्रमातून मिळू शकतात. त्यामुळे शिवसैनिक आणि वंचितच्या कार्यकर्त्यांच्या नजरा आजच्या कार्यक्रमाकडे लागल्या आहेत. या कार्यक्रमाला दोन्ही पक्षाचे कार्यकर्ते गर्दी करण्याची शक्यता आहे. ‘ प्रबोधनकार डॉट कॉम’चा लोकार्पणाचा सोहळा संध्याकाळी साडेसात वाजता दादर पश्चिम येथील शिवाजी मंदिर येथे होत आहे. या कार्यक्रमाला प्रबोधन प्रकाशनाचे सुभाष देसाई उपस्थित राहणार आहेत.
जवळच्या शहरातील बातम्या
Marathi News App: तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? सिटिझन रिपोर्टर अॅप डाउनलोड करा आणि रिपोर्ट्स पाठवा.
