म. टा. प्रतिनिधी, ठाणे : मुलुंड ते ठाणेदरम्यानच्या कोपरी पुलाचे सात गर्डर उभारण्याचे काम सोमवारी पहाटे पूर्ण झाले. यामुळे या पुलाच्या दुसऱ्या टप्प्यातील महत्त्वपूर्ण कामे मार्गी लागल्याने वाहतूक पोलिसांनी सुटकेचा निःश्वास सोडला आहे. यापुढील कामासाठी वाहतूकबदलाची आवश्यकता नसल्याचे पोलिसांचे म्हणणे आहे. पुलाचे काम पुढील काही महिन्यांमध्ये पूर्ण झाल्यानंतर तो पूर्ण क्षमतेने वाहतुकीसाठी खुला होऊ शकणार आहे. या पुलाचा दुसरा टप्पा खुला झाल्यानंतर ये-जा करण्यासाठी प्रत्येकी चार अशा आठ मार्गिकांचा महामार्ग वाहतुकीसाठी खुला होऊ शकणार आहे.
मुंबई आणि ठाणे शहराच्या वेशीवरील अरुंद कोपरी पूल अनेक वर्षांपासून वाहतुकीसाठी मोठा अडथळा ठरत होता. पूर्व द्रुतगती महामार्गावरील चार मार्गांवरून येणारी वाहने या पुलावर केवळ दोन मार्गिकांवरून पुढे जात असल्यामुळे महानगरांच्या वेशीवर वाहतूककोंडी रोज ठरलेली होती. ती फोडण्यासाठी एममआरडीएच्या मदतीने २०१८मध्ये कोपरी पुलाच्या रुंदीकरणाचे काम हाती घेण्यात आले होते. त्यातील पहिल्या टप्प्यात पुलाच्या दुतर्फा दोन पूल उभारण्यात आले. त्यावर वाहने वळवून त्यानंतर मधल्या पुलाचे काम सुरू करण्यात आले होते. शनिवार ते सोमवार या कालावधीत मध्यरात्री रेल्वे आणि रस्तेवाहतूक थांबवून एमएमआरडीए आणि रेल्वेकडून या उड्डाणपुलाच्या गर्डरउभारणीचे काम पूर्ण करण्यात आले. सुमारे १०४ टन वजनाचे ६३ मीटर लांबीचे सात गर्डर उभारण्याचे काम दोन दिवस सुरू होते. १००हून अधिक मनुष्यबळ आणि ५०० टन आणि ७०० टन क्षमतेच्या दोन क्रेन यासाठी कार्यरत होत्या. हा उड्डाणपूल पूर्ण करून लवकरात लवकर वाहतुकीसाठी खुला करण्याची मागणी ठाणेकरांकडून केली जात आहे.
नव्या कोऱ्या तरणतलावाची झाली कचराकुंडी; मिरा-भाईंदर पालिकेचा भोंगळ कारभार
