Maharashtra Political crisis | आपल्या मतदारसंघातील जनतेच्या मागण्या पूर्ण व्हाव्यात, ही प्रत्येक लोकप्रतिनिधीची भूमिका असते. विकासात्मक क्रांती करणारा प्रकल्प जो राजापूरमध्ये येतोय त्यासंदर्भात राजन साळवी यांनी सकारात्मक भूमिका घेतली, त्याबद्दल मी त्यांचे स्वागत करतो. भविष्यात त्यांच्या मतदारसंघातील लोकही अशीच भूमिका घेतील, ही अपेक्षा करतो. आम्हाला शेतकरी किंवा स्थानिक लोकांवर कोणताही दबाव आणायचा नाही.

 

Rajan Salvi
राजन साळवी

हायलाइट्स:

  • राजन साळवी यांनी एक लोकप्रतिनिधी म्हणून सकारात्मक भूमिका मांडली
  • मी राजन साळवी यांच्या भूमिकेचे स्वागत करतो
मुंबई: कोकणातील बारसू रिफायनरी प्रकल्पासाठी शिंदे-फडणवीस सरकारने मंगळवारी बोलावलेल्या बैठकीला ठाकरे गटाचे आमदार राजन साळवी यांची उपस्थिती चर्चेचा विषय ठरली. या बैठकीनंतर झालेल्या पत्रकार परिषदेत उद्योगमंत्री उदय सामंत यांनी राजन साळवी यांनी मुक्तकंठाने तारीफ केली. त्यामुळे राजकीय वर्तुळाच्या भुवया उंचावल्या आहेत. यानिमित्ताने पुन्हा एकदा राजन साळवी ठाकरेंची साथ सोडून शिंदे गटात सामील होणार असल्याच्या चर्चेला उधाण आले आहे.

उदय सामंत यांनी बैठकीबाबत माहिती देताना राजन साळवी यांचा आवर्जून उल्लेख केला. राजन साळवी यांनी आजच्या बैठकीची मिनिटस मला आठ दिवसांमध्ये द्यावीत, अशी मागणी केली. आम्ही त्यांना दोन दिवसांत बैठकीची मिनिटस् उपलब्ध करून देणार आहोत. आजच्या बैठकीतील चर्चा सकारात्मक झाली. राजन साळवी यांनी एक लोकप्रतिनिधी म्हणून सकारात्मक भूमिका मांडली. यावेळी त्यांनी प्रशासन म्हणून कंपनीच्या लोकांसोबत आपली एक बैठक व्हावी, याची गरज व्यक्त केली. तसेच जमिनीचा भाव अंतिम होणे, बाजारभावापेक्षा स्थानिकांना जास्त पैसे मिळावेत, अशा मागण्याही त्यांनी केल्या. त्यांच्या राजन साळवी यांच्या या सगळ्या मागण्या सकारात्मक होत्या. या सर्व जनतेच्या मनातील भावना आहेत, हे सांगायलाही साळवी विसरले नाहीत. कंपनीने स्थानिकांच्या या मागण्या पूर्ण न केल्यास रिफायनरी प्रकल्पाला समर्थन देण्याची माझी भूमिका बदलेल, असेही राजन साळवी यांनी सांगितले. त्यांच्या या भूमिकेत कुठेही नकारात्मकपणा नसल्याचे उदय सामंत यांनी सांगितले.

आपल्या मतदारसंघातील जनतेच्या मागण्या पूर्ण व्हाव्यात, ही प्रत्येक लोकप्रतिनिधीची भूमिका असते. विकासात्मक क्रांती करणारा प्रकल्प जो राजापूरमध्ये येतोय त्यासंदर्भात राजन साळवी यांनी सकारात्मक भूमिका घेतली, त्याबद्दल मी त्यांचे स्वागत करतो. भविष्यात त्यांच्या मतदारसंघातील लोकही अशीच भूमिका घेतील, ही अपेक्षा करतो. आम्हाला शेतकरी किंवा स्थानिक लोकांवर कोणताही दबाव आणायचा नाही. प्रकल्पाबाबत जनजागृती करण्यासाठी आम्ही त्याठिकाणी प्रशिक्षण वर्ग घेऊ, असेही उदय सामंत यांनी सांगितले.

प्रकल्प पुढे सरकरण्याचे श्रेय राजन साळवींना देणार का?

या पत्रकार परिषदेत उदय सामंत यांनी वारंवार राजन साळवी यांचा उल्लेख केला. त्यामुळे पत्रकारांनी त्यांना तुम्ही हा प्रकल्प पुढे जाण्याचे श्रेय राजन साळवी यांना देणार का, असा प्रश्न विचारला. त्यावर उदय सामंत यांनी म्हटले की, मी राजन साळवी यांचे नाव एवढ्यासाठीच घेतले की, त्यांनी लोकप्रतिनिधी म्हणून सकारात्मक भूमिका घेतली. अशा लोकप्रतिनधींच्या पाठिशी उभे राहणे हे सरकारचे कर्तव्य आहे. या बैठकीला कोणीही राजकीय रंग देऊ नये. एखाद्या लोकप्रतिनिधीला मग ते माझ्या विचाराचे असतील किंवा नसतील, एखाद्या लोकप्रतिनिधीने सरकारला पाठिंबा देण्याची म्हणजे प्रकल्पाच्यादृष्टीने पाठिंबा देण्याची भूमिका घेतली असेल तर त्याकडे राजकारण बाजूला ठेवून पाहिले पाहिजे, असे राजन साळवी यांनी म्हटले.

कोकणाचे रासायनिक गटार होऊ देणार नाही;रिफायनरीविरोधी संघटनेची भूमिका

बारसु- सोलगाव पंचक्रोशी रिफायनरी विरोधी संघटनेच्या बैठकीत यापुढे योग्य समन्वय ठेवून हा रिफायनरी विरोधी लढा सुरु ठेवायचा अशी भूमिका घेण्यात आली आहे. कोकण रिफायनरी प्रकल्प विरोधी संघर्ष संघटना आणि नाटे पंचक्रोशी रिफायनरी विरोधी संघटना यांच्या पदाधिकाऱ्यांची संयुक्त बैठक सोमवारी पार पडली. प्रदूषणकारी रिफायनरी विरोधातील आंदोलन आपापसांत यापुढे योग्य समन्वय ठेवून लढायच असे एकमताने ठरल्याची माहिती पदाधिकाऱ्यांनी दिली आहे. कोकणाचे रासायनिक गटार होऊ नये म्हणून सहभागी होणारे नवीन व्यक्ती , संघटना , गावे यांच्या प्रतिनिधींनाही समाविष्ट करून हा रिफायनरी विरोधी संघर्ष कोकणव्यापी करण्याला सर्वाना कोकण रक्षणाच्या समान धाग्यात बांधण्याला योग्य प्रारूप द्यायचे अस ठरवण्यात आले. राजकीय भूमिका व त्यावरील प्रतिक्रिया आदी मध्ये एकवाक्यता असावी याबद्दल सर्वांचे एकमत या बैठकीत झाले आहे.

जवळच्या शहरातील बातम्या

Marathi News App: तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? सिटिझन रिपोर्टर अॅप डाउनलोड करा आणि रिपोर्ट्स पाठवा.

LEAVE A REPLY

Please enter your comment!
Please enter your name here