Maharashtra Political crisis | महाराष्ट्राच्या राजकारणाच्यादृष्टीने सध्याचा विकेंड हिट ठरण्याची शक्यता आहे. कारण आज आणि उद्या महाराष्ट्राच्या राजकारणाच्यादृष्टीने महत्त्वाच्या घडामोडी घडणार आहेत. मुख्यमंत्री एकनाथ शिंदे हे शनिवारी आणि रविवारी हे दोन दिवस गुवाहाटीच्या दौऱ्यावर असतील. तर उद्धव ठाकरे आज बुलढाण्यात जाऊन शेतकरी मेळाव्याला संबोधित करणार आहेत. या दोन्ही कार्यक्रमांसाठी ठाकरे गट आणि शिंदे गटाकडून जय्यत तयारी करण्यात आली आहे.

 

Eknath Shinde Vs Uddhav Thackeray
एकनाथ शिंदे Vs उद्धव ठाकरे

हायलाइट्स:

  • बुलढाण्यातील चिखली येथे उद्धव ठाकरे यांच्या उपस्थितीत शेतकरी मेळावा
  • उद्धव ठाकरे आगामी लढाईसाठी कशाप्रकारे एल्गार करणार?
मुंबई: एकनाथ शिंदे यांच्या बंडानंतर महाराष्ट्रात सुरु झालेल्या राजकीय सत्तासंघर्षाला आता तब्बल पाच महिने पूर्ण झाले आहेत. या पार्श्वभूमीवर शनिवारी ठाकरे गट आणि शिंदे गटाकडून होणाऱ्या शक्तीप्रदर्शनामुळे आजचा दिवस महाराष्ट्राच्या राजकारणाच्यादृष्टीने हायव्होल्टेज ठरण्याची शक्यता आहे. मुख्यमंत्री एकनाथ शिंदे हे शनिवारी आणि रविवारी हे दोन दिवस गुवाहाटीच्या दौऱ्यावर असतील. याठिकाणी ते आपल्या गटाच्या जवळपास ५० आमदारांसह कामाख्या देवीचे दर्शन घेणार आहेत. महाराष्ट्रातील आगामी राजकारणाच्यादृष्टीने एकनाथ शिंदे यांचा गुवाहाटी दौरा महत्त्वपूर्ण ठरण्याची शक्यता आहे. या दौऱ्यानंतर ते महाराष्ट्राच्या राजकारणाला कलाटणी देणारा, आणखी एखादा निर्णय घेणार का, याची सर्वांना उत्सुकता आहे. त्यामुळे एकनाथ शिंदे यांच्या गुवाहाटी दौऱ्यात काय घडणार, याकडे सर्वांच्या नजरा लागल्या आहेत.

एकनाथ शिंदे हे देवदर्शनासाठी गुवाहाटीत असताना उद्धव ठाकरे हे जनतेच्या दरबारात जाणार आहेत. एकनाथ शिंदे यांच्या बंडानंतर उद्धव ठाकरे हे पहिल्यांदाच विदर्भात जाणार आहेत. बुलढाण्यातील चिखली येथे उद्धव ठाकरे यांच्या उपस्थितीत शेतकरी मेळावा पार पडणार आहे. त्यामुळे या मेळाव्यातून उद्धव ठाकरे आगामी लढाईसाठी कशाप्रकारे एल्गार करणार, ते पाहावे लागेल. चिखली येथील तालुका क्रीडा संकुलाच्या मैदानावर या शेतकरी मेळाव्याचे आयोजन करण्यात आले आहे. दुपारी तीन वाजता हा मेळावा सुरु होईल. यावेळी उद्धव ठाकरे शेतकरी आत्महत्या, ओला दुष्काळ, सरकारकडून नुकसानभरपाई मिळण्यास होत असलेला विलंब या मुद्द्यांवरुन शिंदे-फडणवीस सरकारला कशाप्रकारे लक्ष्य करणार, हे पाहावे लागेल.
राजकीय शत्रू आता सख्खे शेजारी, ठाकरे गटाच्या ‘शिवालय’जवळच शिंदे गटाचे कार्यालय

गुवाहाटी दौऱ्यानंतर मंत्रिमंडळ विस्ताराच्या चर्चांना उधाण

एकनाथ शिंदे हे गुवाहाटी दौऱ्यावरुन परतल्यानंतर राज्यातील रखडलेला मंत्रिमंडळाचा विस्तार मार्गी लागेल, अशी शक्यता सूत्रांकडून वर्तविली जात आहे. हिवाळी अधिवेशनाच्या पूर्वी म्हणजे ५ ते ८ डिसेंबर या कालावधीत शिंदे-फडणवीस सरकारचा मंत्रिमंडळ विस्तार होऊ शकतो. यामध्ये शिंदे गटातील संजय शिरसाट यांच्यासारखे नाराज आमदार, बच्चू कडू यांना संधी मिळण्याची दाट शक्यता आहे.

उद्धव ठाकरेंनी केली नेत्यांची कानउघाडणी, महिला नेत्यांमधील गटबाजी चव्हाट्यावर

उद्धव ठाकरेंच्या सभेपूर्वी पोलिसांच्या महत्त्वाच्या सूचना

उद्धव ठाकरे यांनी बुलढाण्यातील सभा वादळी ठरण्याची शक्यता आहे. या सभेत उद्धव ठाकरे हे शेतकऱ्यांच्या प्रश्नांसह राज्यपाल कोश्यारी यांनी छत्रपती शिवाजी महाराजांविषयी केलेल्या वादग्रस्त वक्तव्याबाबतही बोलण्याची शक्यता आहे. उद्धव ठाकरे यांच्या सभेच्या निमित्ताने विदर्भातील शिवसेनेचा (ठाकरे गट) केडर चार्ज होण्याची शक्यता आहे. त्यामुळे आजच्या सभेवेळी ठाकरे गटाकडून बुलढाण्यात मोठे शक्तीप्रदर्शन पाहायला मिळू शकते. या पार्श्वभूमीवर पोलिसांनी उद्धव ठाकरे यांच्या सभेसाठी काही अटी घातल्या आहेत. या सभेदरम्यान ‘बाळासाहेब ठाकरे अमर रहे’, ‘उद्धव ठाकरे आगे बढो’ या दोनच घोषणा द्याव्यात. तसेच मशाल पेटवण्यासाठी कोणतेही ज्वलनशील पदार्थ सोबत बाळगू नयेत. भाषणात कोणाच्याही भावना दुखावल्या जातील, असे वक्तव्य करु नये, अशा सूचना पोलिसांनी दिल्या आहेत. त्यामुळे आज प्रत्यक्ष सभेत काय घडणार, याची उत्सुकता सर्वांना लागली आहे.

जवळच्या शहरातील बातम्या

Marathi News App: तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? सिटिझन रिपोर्टर अॅप डाउनलोड करा आणि रिपोर्ट्स पाठवा.

LEAVE A REPLY

Please enter your comment!
Please enter your name here